DILI—Deskonfia membru hosi Organizasaun Arte Marsiál, Kmanek Oan Rai Klaran (KORK), ne’ebé ba halo sakrifísiu iha Ainaru mak hatún no soe bandeira CNRT ba rai,
“Ha’u haruka ona ami nia sub-KRAM sira iha munisípiu sira hodi bele buka tuir informasaun ida ne’e, tebes ka lae no akontese iha ne’ebé inklui se mak halo,” Prezidente KRAM, Fernando António da Costa “Ato Lekinawa” iha nia servisu fatin Lesidere, Kuarta (12/04).
Lekinawa dehan, nia rasik rona informasaun ne’e liu de’it husi rede sosiál Facebook.
“Sim, kona-ba ida ne’e ami mós rona de’it informasaun no haree de’it video hosi média sosiál hanesan Facebook, maibé ami seidauk hetan ka simu informasaun konkreta kona-ba ida ne’e,” nia hatutan
Tanba ne’e, nia parte orienta ona ekipa hodi buka tuir informasaun sira ne’e ho loloos, katak loos duni buat sira ne’e akontese duni ka lae no tebes membru organizasaun KORK sira mak halo duni ka lae, mak bele fó sai informasaun klaru ba públiku.
Nia dehan, agora labele fó komentáriu detalla kona-ba ida ne’e, tanba KRAM rasik seidauk simu informasaun loos, ne’ebé sei buka tuir informasaun ida ne’e, karik hetan klaru ona foin bele fó sai informasaun detalla ba públiku.
Nia aumenta, tanba sira nia parte laiha ne’ebá, entaun sira depende de’it ba informasaun sira hosi parte Sub-KRAM sira iha munisípiu, tanba ne’e nia orienta ona hodi buka tuir informasaun sira ne’e.
“Ami presiza simu fali informasaun sira hosi ami nia Sub-KRAM sira, karik sira hato’o ona informasaun sira ne’e mai mak ami sei hato’o fali ba iha públiku liuhosi média sira hodi bele públika atu nune’e ema hotu bele hatene klaru informasaun ne’e ho loloos”, nia hateten.
Nia dehan, informasaun la’ós ida ne’e de’it, iha mós informasaun seluk katak, membru KORK sira ba partisipa serimónia sakrifísiu iha Ainaru ne’e, mós balun dehan atake komunidade sira, maibé ida ne’e mós informasaun seidauk loos, tanba sira nia parte seidauk simu informasaun klaru.
Maibé sira nia parte mós kontinua halo komunikasaun di’ak ho estrutura Arte Marsiál KORK ninian, hodi realiza serimónia sakrifísiu ida ne’e karik tenke tuir duni nia regra no objetivu sakrifísiu ne’e rasik.
Hatudu Valor Hosi Sakrifísiu
Entretantu Lekinawa hatete, KORK, tinan-tinan loron 12 fulan Abríl sempre halo serimónia sakrifísiu.
Tanba ne’e nia husu ba Sekretáriu Jerál KORK, tenke hatudu valor hosi sakrifísiu ne’e rasik no tenke mantein pas no estabilidade.
“Ami husu ba Sekretáriu Jerál KORK, katak atividade sakrifísiu ne’e tenke hatudu duni nia valor, tanba KORK iha valor espirituál ne’ebé sira kaer, entaun ami iha esperansa boot sira halo tuir duni no husu hametin estabilidade iha ita nia rain,” nia subliña.
Nia hatete, kuandu atividade ne’e hotu fahe malu ho hakmatek ida-idak fila mai to’o iha nia fatin labele mosu perturbasaun ruma tuir dalan iha fatin públiku sira”, dehan Prezidente KRAM, Fernando António da Costa “Ato Lekinawa”
Nia aumenta, ne’ebé informasaun ne’ebé mak rona hosi sira katak, sira halo ona koordenasaun ho autoridade sira iha Ainaru liu-liu ba iha autoridade seguransa sira iha munisípiu Ainaru hodi halo seguransa ba sira nia atividade durante ne’e.
“Tanba ne’e mak ami espera buat hotu-hotu sei la’o ho di’ak durante sira nia atividade sakrifísiu ne’e la’o liu-liu ba iha loron ohin ninian, tanba hetan seguransa másimu hosi autoridade seguransa sira, tanba sira halo ona kooperasaun”, nia esplika.
Nia hateten, nia parte mós hetan duni konvite tuir loloos atu ba partisipa hotu, maibé la konsege ba tanba sira iha atividade seluk ida ne’ebé mak importante loos nune’e sira sei halo preparasaun ba ida ne’e, tanba ne’e mak sira la konsege ba partisipa maibé sub-KRAM iha Ainaru mak sei partisipa hamutuk ho nia konselleiru sira iha ne’ebá.
“Agora atividade sakrifísiu ne’e KORK sira halo ona kada tinan dezde uluk to’o agora, no iha pasadu akontese ida ka rua hodi hamosu vítima no estraga buat sira ne’e , maibé tinan ida ne’e sira garantia sei la’o normal no buat ida sei la akontese”, Nia deklara.
Nia subliña, iha semana kotuk mak sira konsege rona katak iha duni provokasaun balun maibé parte seguransa ne’ebá atende kedas no rezolvidu, maibé ne’e mós dehan laiha relasaun ho arte Marsiál sira, ne’ebé sira rezolve ona.
“Ha’u hanoin sira nia programa agora sei kontinua la’o hela, ha’u espera programa no serimónia ne’e to’o hotu mós sei la akontese buat ruma ne’ebé mak fó impaktu ba komunidade nia vida ka komunidade sira nia moris”, nia hakotu.
1,209 total views, 3 views today
Bele hare Video Seluk :
Subscribe to Timorpost
