(Reportájen Cesario de Sousa/Editor Suzana Cardoso)
DILI (Timor Post) – Selebra loron Restaurasaun Independensia Timor-Leste ba dala XIX, Lidér Karismátiku, Kay Rala Xanana Gusmão husu ba hotu-hotu atu kuidadu aan hosi Pandemia Covid-19.
“Ferik, katuas no kiik sira ita ohin selebra restaurasaun ne’ebé halo ona tinan 19. Covid iha hela ita nia leet. Ba Ama ferik ho Apa katuas sira hau la preokupa. Tanba sira laos lao tun-sae,” katak Xanana ba komunidade iha area Bekiar Metinaru, Kinta (20/05) hodi hatutan.
Ba joventude sira mak iha responsabilidade boot. Tanba joven sira mak lao ba-mai. lori fali moras mai. Kuandu lori ona moras mai laos imi mak mesak mate deit. Maibé sei daet too ita mate hotu. Nune’e tenki kuidadu aan.
Eis Prezidente dahuluk hafoin Timor-Leste (TL) restaura ninia independensia iha loron 20 Maiu 2002 ne’e, selebra restaurasaun Independensia 20 Maiu 2021 ne’e ho halo asaun karidade ba komunidade iha Aldeia Aidak Behare Namalai Suku Kamea, Fatuahi, Postu Administrativu Kristu Rei no iha Area Bekiar Suku Wenunuk, Postu administrativu Metinaru. Iha kalan Xanana selebra hamutuk ho komunidade iha Maslidun ho dahur.
Loron 20 de Maiu hanesan loron ne’ebé Timoroan hotu selebra komemorasaun restauarasaun Independemsia ne’ebé proklama ona iha loron 28 Novembru 1975 liuba. Iha aniversariu ba dala XIX ne’e governu produs tiha konvite, maibé kansela tiha tanba Pandemia Covid-19.
Nune’e Lider Nasionál Xanana selebra ho halo asaun karidade. Iha asaun ne’e Xanana hamutuk ho nia ekipa fahe sasan nesesidade bazika ba komunidade kbiit laek no afedadu inundasaun iha aldeia Aidak behare Namalai Suku Kamea, Fatuahi postu Kristu Rei no iha Area Bekiar, Suku Wenunuk Postu Administrativu Metinaru.
Komunidade ho entuziazmu simu Xanana ho ksolok no haklalak. Hafoin hasoru malu ho komunidade sira husi Labarik to’o ferik-Katuas halai duni tuir no ida-ida hakarak atu kaer liman ho Xanana.
Iha tempu ne’eba, Xanana apela ba hotu-hotu atu kuidadu aan. Liliu joven sira atu lao karik kuidadu aan. Nune’e labele fó impatu ba ferik no katuas sira iha sosiadade nia leet. Halo atividade ne’ebé importante deit.
“Tanba nee nasaun barak preokupa ho covid-19. Presiza joven sira atu lao karik kuidadu aan. Atu nune’e labele fó impaktu ba ferik no katuas sira iha sosiedade nia leet,” hateten Xanana husu hotu-hotu hakmatek.
Iha area Bekiar, Suku Wenunuk hamutuk uma kain 96. Apoiu nesesidade bazika husi Lidér Karismátiku nee mak hanesan; supermi, foos, koto, mina Bimoli no seluk tan. (Lee notisia seluk iha jornal Timor Post)
896 total views, 3 views today
Bele hare Video Seluk :
Subscribe to Timorpost
