DILI-Iha tinan ne’e Postu administrativu Kristu Rei, munisípiu Dili tau prioridade ba programa tolu (3).
“Ami nia planu tinan ne’e tau prioridade ba programa tolu, mak programa Uma Naroman Ba Povu, Instala bee moos ba komunidade ne’ebé seidauk asesu no programa PMOPA hodi limpeza jerál iha postu, suku no aldeia”, informa administradór postu Kristu Rei Venâncio Tavares ba Timor Post iha Bekora, Kuarta (22/03).
Administradór ne’e konta, programa tolu ne’e iha nia benefísiu ba komunidade ne’ebé laiha kbiit atu hari uma, ka instala bee moos atu konsumu ba nesesidade família nian.
Iha programa PMOPA nian mak limpeza jerál iha suku no bairru ida-idak hodi prevene moras dengue, respiratóriu, moras kulit, diarreia no mós bele redús inundasaun iha tempu udan.
Iha postu refere identifika ona komunidade ne’ebé moris vulneravel liu hamutuk xefe família haat maka merese hetan Uma Naroman ba Povu, enkuantu UNP plus B nian komunidade 37 maka hetan kalén hodi troka sira nia uma kalén porozu no kalén kuak.
Enkuantu, iha tinan 2022 iha postu refere xefe suku no xefe aldeia identifika komunidade ne’ebé moris vulneravel maka hetan Uma Naroman Ba Povu hamutuk 20 no komunidade ne’ebé uma kalén porozu hamutuk 296 maka asesu ba Uma Naroman plus B.
Nia dehan, komunidade ne’ebé merese hetan Uma Naroman Ba Povu nia iha rai rasik maibé tenke iha sertifikadu rai atu nune’e estadu hari uma ne’e sai permanente ba nia atu hela.
Se estadu harii tiha uma ba komunidade refere maka la’ós nia rai ka nia aluga podik ema nia rai ida aban bairua sei mosu problema tanba ne’e maka estadu hari uma ba komunidade sira presiza verifika loloos antes halo konstrusaun ba uma refere.
Portantu, postu administrative Kristu Rei ho nia suku hamutuk 8, maka suku Bekora, Kamea, Kulu hun, Balibar, Hera, Metiaut, Ailok, Bidau Santana, ho nia xefe aldeia hamutuk 51 ho nia populasaun hamutuk 77.229 ho nia xefe família kompostu feto 38.182 no mane hamutuk 39.060.
590 total views, 3 views today
