DILI—Polisia Nasionál Timor-Leste (PNTL), liuhosi Komandu Seksaun Operasaun Polisia munisípiu Dili, hahú aperta seguransa ba sidade Dili, ligadu ho preparasaun kampaña Eleisaun Parlamentár, ne’ebé atu realiza iha semana oin.
“Ami hetan orientasaun husi komandu katak, ami sei halo operasaun tama sai bairru iha Dili laran, la’o ain no mós balu ho karreta iha estrada, atu garantia kampaña Eleisaun Parlamentár realiza ho di’ak,” Komandante Seksaun Operasaun munisípiu Dili, Inspetór Xefe Polisia José Luis Amaral, informa ba Timor Post via Telefone, Kuarta (12/04).
Aleinde Komandu munisípiu sira koloka ona Ofisial Polisia Suku (OPS) kada suku, hodi halo kontrolu, unidade Task Force sira mós komandu munisípiu Dili halo patrulla kalan, hodi fó seguransa ba komunidade sira iha Dili laran.
“Ami koloka ona Ofisial Polisia Suku, atu halo seguransa iha kada suku, maibé ami iha seksaun operasaun komandu munisípiu mós halo patrollamentu ba tama sai bairru, hodi fó seguransa komunidade iha Dili”, nia hateten.
Tuir nia, maski ho limitasasaun ba membru PNTL, maibé volume servisu hasa’e tan, halo patrollamentu rigorozu, apoiu tan husi unidade no seksaun polísia sira seluk, ne’ebé garantia kampaña eleitorál sei la’o di’ak.
Antes ne’e, Polisia Nasionál Timor-Leste (PNTL), liuhosi Seksaun Operasionál Komandu Polisia munisípiu Dili, garantia membru Polisia sira prontu, atu kontrola fatin risku konflitu iha kapitál Dili, durante kampaña Eleisaun Parlamentár.
“Ami hatán ona orientasaun hosi Komandu munisípiu Dili, atu halo kontrolu rigorozu iha fatin risku konflitu sira iha Dili laran, ami nia membru sira mós prontu atu fó seguransa, hahú agora to’o eleisaun,” nia hateten.
Inspetór Xefe Polisia ne’e esplika, membru Polísia munisípiu Dili preparadu dezde komandu Polisia munisípiu Dili, iha semana rua ba kotuk orienta ona, tanba ne’e mak agora daudauk movimentasaun pesoál PNTL sira hahú halo kontrolu la’o ain tama sai bairru iha sidade laran.
“Ami membru sira preparadu ona, atu fó seguransa ba komunidade sira iha Dili laran, orientasaun komandu mai ami klaru, ne’ebé kalan-kalan membru sira kontrola la’o ain tama sai bairru sira, parte ida seguransa ne’ebé ami hahú la’o ona”, nia esplika.
Alende Timor Post konfirma kona-ba fatin risku konflitu iha sidade Dili, Komandante Operasaun hatán katak, Komandu PNTL labele fó sai ba públiku, maibé konserteza Dili iha movimentu sidadaun Timoroan sira husi munisípiu 13 inklui RAEOA hela hotu Dili, entaun fatin balu identifikadu sai fatin risku.
Komandu Polísia munisípiu Dili identifika hotu ona, antesipadamente komandu Polísia halo orientasaun, atu ta’u seguransa ba fatin sira ne’ebé identifikadu ona sai fatin problemátiku durante kampaña to’o realiza Eleisaun Parlamentár.
“Ami labele fó sai fatin risku sira ne’e, más ita hotu hatene Dili ema husi munisípiu 14 mak mai hotu, ne’ebé iha duni fatin risku ne’ebé ami identifikadu ona, maibé ami hetan orientasaun hosi komandu katak, ami bele tau ona seguransa ba fatin sira ne’e durante kampaña to’o eleisaun remata”, nia hateten.
Komandante ne’e ho esperansa ida katak, apoiu seguransa husi unidade Polísia sira seluk, inklui informasaun sekreta F-FDTL no Instituisaun Intelijénsia sira seluk, liu-liu komunidade sira iha Dili koopera di’ak mak garantia kampaña Eleisaun Parlamentár, tinan ne’e sei la’o ho di’ak.
4,416 total views, 3 views today
Bele hare Video Seluk :
Subscribe to Timorpost
