Reportajen Estaziada Ermelinda Caet/Asistente Editor Hermenegildo Tilman.
Dili (Timor Post)—Sarani Katólika iha Dili, ohin komemora loron solenidade Corpus Christi, 16 Juñu 2022, depois tinan 2 coronavirus impoin lockdown, ohin bele fali selebra iha públiku hodi lori Kristu nia futar isin iha prosisaun.
Prosisaun hahú husi parókia Balide bá to’o Jardín Lesidere iha monumentu Imakulada Konseisaun nia oin.
Kardinál Virgílio da Silva SDB iha omilia ne’ebe liga ba ekolojia sita Papa Francisco nia ensíklika hodi konvida sarani sira ba atitude eukarístiku, agradese ba kriasaun ne’ebé Aman hakiak no entrega ba ema atu tau matan. “Iha Eukaristia mak buat hotu ne’ebé Maromak hakiak hetan ezaltasaun aas liu hotu. Grasa sai tanjivel bainhira Maromak rasik sai ema, sai paun ba nia kriatura sira”. Hateten Kardinál Virgílio do Carmo da Silva, SDB iha selebrasaun Eukaristia Corpus de Christi iha Monumentu Nossa Senhora Largo Lesidere, Kinta (16/06).
Iha Komemorasaun ba Loron Corpus de Christi, ne’e mós Arsebispu, husu ba sarani sira iha territóriu tomak atu hadomi, kuidadu Ambiente no natureza ne’ebe mak Maromak fó ona mai ita ema hodi uza.
“Tanba dala barak egoízmu ita ema nian nia kaan-teen esplora no estraga kriasaun envezde kuidadu. Atitude kuidadu hanesan hamoos no la soe lixu arbiru, sei lori benefísiu ba ema, selae sei akontese tan inundasaun hanesan 4 Abríl 2021, tanba ne’e mai ita hadomi no kuidadu Ambiente”.
Nia dehan, loron ohin ne’e importante tebes mai ita sarani hotu hodi hanoin no halo reflesaun kona-ba sakrifísiu Jesus nian ne’ebe mak oferese nia an mai ita hotu, tanba hadomi mundu ida to fó ninia aan nu’udar ai-han ba sarani tomak.
“Ida nee ita rona beibeik ona maibé buat ida ne’e ohin partikularmente no ha’u nia reflesaun ha’u konvida ita boot sira atu selebra loron Corpus de Christi hodi Liga ho tema Dioseze nian Kona-ba Eukaristia Ekolojia nian no Ambiente, atu nune’e reflete ita nia an hodi hadomi ambiente ne’e”, Kardinál Virgílio afirma.
Nia hatete, Na’i Jesus Kristu maski Maromak, maibé Nia hili asaun ne’ebe mak hanesan ita ema ne’e halo aan moris iha mundu ne’e no iha rai ida ne’e no moris iha ambiente ida ne’e han no hela iha mundu ne’e nian liuhusi buat sira ne’e mak moris enkarna nia aan no halo fatin santu ida ne’e sai lulik ho Santu.
“Ne’e duni Na’i Jesus Kristu foti paun ho trigu iha paun ne’e nakfila ba Jesus ninia isin hodi fó ita ema ida ne’e mak dehan se mak han Ha’u nia isin, se mak hemu Ha’u nia ran nia sei moris ba nafatin”, D. Virgílio apela.
Antes hakotu Kardinál Virgílio, konvida sarani katolik iha Timor laran, atu tau konxiénsia iha an eduka an kuidadu kriasaun nian, ba rona no hatán ba rai nia hakilar, tanba ohin loron mosu inundasaun, atitude esplorasaun, estragu tanba de’it ego ita nian ne’ebe mak lakohi respeita natureza, tanba ne’e iha solenidade Corpus de Christi ne’e mai ita halo reflesaun ba an hodi hadomi ita nia natureza ne’ebe mak agora sai mukit ba daudaun. Hakotu. (Lee Notísia Seluk Iha Jornál Timor Post/Asesu You Tube Timor Post).
1,490 total views, 3 views today
Bele hare Video Seluk :
Subscribe to Timorpost
