(Reportajen Jose Mauno/Editor Mateus da Cruz)
Baukau (Timor Post )– Kandidatu prezidente repúblika períodu 2022-2027, Jose Manuel Ramos Horta, konsidera tasa eletrisidade iha Timor-Leste oho setór privadu sira, tanba karun loos, nune’e karik eleitu sei ko’alia ho governu hodi hatún tiha tasa ne’e, liu-liu ba setór privadu sira ne’ebé fó empregu ba ema barak.
“Eletrisidade haree governu la hatudu nia imajinasaun, matenek para haree tanba ita nia eletrisidade karun tebe-tebes. Eletrisidade ne’e oho setór privadu”, nia dehan iha kampaña eleitorál ho maneira diálogu, iha Munisípiu Baukau.
Lee Notisia Relevante : Horta Sei Ko’alia ho Governu Fó Emprestimu Funan Kaman Ba Agrikultór Sira
Nia hatete, Iha rai selu-seluk hanesan Amerika Latina, Asia, Africa kuandu eletrisidade karun tebe-tebes sira haree ema ne’ebé iha bisnis ruma ema atus to’o rihun ida servisu iha nia kompañia entaun hatún nia eletrisidade.
Iha nasaun seluk, governu ko’a nia taxa eletrisidade 5%, 20% no balun to’o 50% depende ema fó servisu. Tanba governu importante liu mak fó servisu ba ema atu fulan-fulan simu osan no tama ekonomia no dinamiza ekonomia.
“Governu la’ós importante liu atu karrega impostu, maibé primeiru mak servisu mak foin komesa kobre impostu para osan tama”, nia dehan.
Tuir nia, durante ne’e governu la haree hodi hatún folin eletrisidade ba setór privadu sira ne’ebé mak fó servisu ba ema barak.
“Ha’u konta de’it Hotel Timor, boot no kualidade liu iha Timor. Fulan-fulan sira selu 30 mil dolar konta ho eletrisidade, loloos tuir standard internasionál hotel ne’e bele gasta 5 mil”, nia afirma.
Tanba Timoroan kuaze ema atus ida resin mak servisu iha hotel Timor. Entaun governu tenke haree tulun sira atu hatún taxa eletrisidade tanba nia fó servisu ba ema 100-resin.
“Ko’alia ho sira katak, imi hatama ema atus ida resin, ami hatún eletrisidade 30% bele liután konforme governu halo akordu. Buat sira ne’e ha’u bele ko’alia ho governu, parlamentu, doadór no setór privadu”, eis PR afirma.
Nia haktuir, prezidente parseria ho governu, parlamentu hatene servisu hamutuk para labele iha konfrontasaun. Prezidente tenke hatene nia knaar, labele deside se mak ba governu tanba governu mai husi maioria parlamentu. (Lee Notisia Seluk Iha Jornal Timor Post/ Asesu You Tube Timor Post)
881 total views, 3 views today
Bele hare Video Seluk :
Subscribe to Timorpost
