Horta Sei Ko’alia ho Governu Fó Emprestimu Funan Kaman Ba Agrikultór Sira    

by -237 views
Kandidatu Prezidente Republika ho numeru sorteiu 1, Jose Ramos Horta, imajen Esp

(Reportajen Jose Mauno/Editor Mateus da Cruz)

Baukau (Timor Post)– Kandidatu prezidente repúblika períodu 2022-2027 ho númeru sorteiu 1, Jose Manuel Ramos Horta, promete, bainhira povu fó fiar assume kargu nu’udar  prezidente repúblika, nia sei ko’alia ho governu atu fó emprestimu ho funan kaman ba agrikultór sira.

Nia hatete,  Prezidente nia knaar la’ós ezekutivu maibé Prezidente ida ne’ebé iha kakutak, hatene bele dezenvolve ideia proposta ba governu oinsá bele apoiu di’ak liu agrikultura.

“Apoiu agrikultór la’ós osan mai husi Ministériu agrikultura, Ministériu agrikultura fó apoiu tékniku, haree musan ne’ebé di’ak, kualidade maibé liu husi sistema bankária entaun governu tau osan iha BNCTL para fó empresta osan ba agrikultura sira,”nia hatete bainhira hala’o diálogu ho komunidade suku Kairiri, Baukau Vila, Sábadu (09/04).

Premiadu Nobel da Paz ne’e hatete, bainhira fó emprestimu ba agrikultura ho funan kaman labele liu 4% no labele hahú selu iha fulan ida, tenke fó períodu tinan rua ba leten, tanba setór privadu sira ne’ebé loke restaurante ohin bele hatama kedas osan maibé agrikultór sira ne’ebé halo toos ne’e presiza tempu.

“Agora lae, agrikultura hahú kee rai, Kosar metan, trator mak halo mós sosa gazolina. Depois hein fulan rua, tolu mak iha rezultadu hotu lori ba merkadu tenke selu transporte ho nia gastu ne’e todan tebe-tebes, e taun emprestimu ba agrikutór labele hanesan ho setór sira selu-seluk,” nia reforsa.

To’o agora, tuir nia,  governu seidauk Ko’alia ho banku sira para hamate tiha funan todan ne’ebé hamate setór privadu.

“Ekonomia ha’u rasik partisipa iha rai selu-seluk, ami halo kampaña kuandu covid-19 hahú, ekominia mundiál tun ha’u rasik partisipa kampaña internasionál para banku boot iha mundu tantu privadu no estadu atu taka tiha funan ba setór privadu iha mundu.

Kampaña ekonomia ne’e la’ós ba rai riku sira de’it, maibé ba nasaun frazil sira iha mundu tanba sei iha krize ekonomia boot ida iha mundu.

Kestaun ida ne’e Prezidente tenke hatene ko’alia ho governu parlamentu, governu bele ko’alia ho banku tantu rai laran no mós internasionál atu koa tiha funan ne’ebé karega ba setór privadu.

“Ita nia Prezidente la halo buat ida, primeiru ministru atu ba Ko’alia ho banku sentral para haree estratejia saida. Entaun Prezidente tenke matenek no influensia.

Entretantu, bainhira eleitu ba prezidente da repúblika, tinan lima mai sei servisu metin ho governu no parlamentu atu dudu ekonomia la’o ba oin.

“Ha’u sei hamutuk ho governu buka tau matan ba Viqueque, Baukau ho Lospalos. Tanbasa, ha’u hanoin ida ne’e, kuandu hanoin ekonomikamente munisípiu tolu ne’e bele halo grupu ida forma bolu unidade ekonomika ida”, haktuir.

Tuir ideia Ramos Horta, munisípiu Ermera tenke sai zona ekonomia espesiál ida besik loos Dili tanba populasaun barak no bele aumenta tan produsaun kafé, bele halo turizmu no di’ak liután sidade Dili muda ba ne’ebá para hamenus populasaun iha Dili.(Lee Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.