BAUKAU (timorpost.com) – Timor-Leste multi partidaria, tanba adopta sistema demokrasia, ne’e duni livre ba ema hotu atu harii partidu.
Amu Pároku Parókia São João Bosco de Laga, Padre Rui Gomes SDB, hatete persiza iha duni partidu barak atu dezenvolve rai ida ne’e ba oin, tanba ne’e sidadaun hotu iha direitu atu harii partidu foun.
“Dadaun ne’e iha partidu 17 ho objetivu klaru, atu ajuda dezenvolve nasaun ba oin no oinsá hadi’a povu nia moris sai di’ak liu”, nia hateten ba Timor Post, hafoin misa Domingu (18/03/2023), semana dahaat tempu Kuarezma iha Igreja Baukau.
Maibé, nia mós husu ba Lider sira, katak ho partidu barak labele sai obstaklu ida ba nasaun nia dezenvolvimentu.
“Ha’u hanoin ne’e buat ne’ebé legal atu individu ka grupu hamosu partidu foun tuir lei haruka”, nia hateten.
Atual Padre Parókia ne’e mós husu ba Líder partidu polítiku sira hotu, iha tempu kampaña labele tolok malu, labele insulta malu, no labele ataka ema nia personalidade.
“Partidu Polítiku sira di’ak liu ba hato’o programa atu nune’e povu haree di’ak mak hili,” nia fó hamoin.
Nia hatutan, lider partidu sira mesak ema sarani katolika, balun la’ós katólika maibé mesak ema fiar nain, entaun fiar katak hotu-hotu la’o tuir prinsípiu ida ne’e atu aprezenta nia programa.
Alende ne’e, Na’i lulik ne’e mós apela ba sarani sira atu kolabora, nune’e bele kria pás, estabilidade, hakmatek no labele hamosu violénsia iha períodu kampaña no eleisaun parlamentar 2023.
844 total views, 6 views today
