DILI, (timorpost.com)– Iha alegasaun primeiru introgatóriu, Ministériu Públiku (MP) liuhosi Prokuradór, Ricardo Leite, husu ba tribunál atu aplika medida koasaun Prizaun Preventiva ba rguidu na’in-3 ho naran inisiál MMH, ET no AM, tanba envolve iha krime Roubo, ne’ebé deskonfia uza karreta luxu hodi na’ok sasan no osan iha loja Leadso iha munisípiu Likisa.
Tuir defeza ba arguidu sira, Defensór Públiku, Manuel Sarmento, hatete, iha prosesu primeiru interogatóriu ne’e, MP promove krime Roubo iha artigu 153, previstu iha Kódigu Penál ba arguidu na’in-3.
“Prosesu primeiru introgatóriu ne’e, seiduak iha desizaun, maibé iha alegasaun Ministériu Públiku nian, husu ba tribunál atu aplika medida koasaun Prizaun Preventiva ba arguidu na’in-3, tanba deskonfia iha duni indísiu katak arguidu sira komete iha krime Roubo, maibé ha’u hanesan parte defeza iha ha’u-nia alegasaun husu ba tribunál atu aplika medida koasaun Apresentasaun Periódika ba ha’u-nia kliente sira”, dehan defeza ba arguidu sira, Defensor Publiku, Manuel Sarmento, ba jornalista sira iha TJPID, Bebora, Tersa-kalan, (02/04).
Tuir defeza, iha alegasaun MP ho defeza husu medida ne’ebé la hanesan maibé depende ba desizaun husi tribunál nian.
“Ohin mós arguidu sira konfesza parsiál, maibé arguidu balun konfesa no balun lae, tanba, ba iha prosesu investigasaun mak ita foin haree, tanba ita seiduak hatene loloos katak sira halo duni ka lae”, dehan defeza.
Enkuantu rona tiha alegasaun husi parte defeza no Ministériu Públiku, tribunál hadi’a hikas prosesu primeiru introgatóriu ne’e ba iha loron 03 fulan-Abril tinan 2024, iha oras 02:00 lokraik hodi submete ba desizaun.
Enkuantu, kazu ne’e akontese iha aldeia Leopa, suku Dato, postu Likisa, munisípiu Likisa, Kinta, (28/03/2024), tuku 03:45, madrugada, arguidu sira halo asaun sobu no estraga tiha odamatan loja Leadso. Tuir provas video CCTV ne’ebé akapta iha loja Leadso-Xinés nian iha Likisa katak, arguidu sira na’ok sasán, utiliza karreta luxu rua ho marka CX-7, kór mutin, Xapa Matrikula A. 12-4xx TL ho karreta Land Cruiser Prado, kór-silver, xapa matríkula 23-0xx TL.
Antes atu foti sasán hirak ne’e, arguidu sira kesi tiha loja na’in ho naran Wan Yong Chao, depois mak foti sasán sira ne’e.
Depois ida-ne’e, loja na’in informa ba PNTL Likisa hodi kaptura arguidu sira iha loron Sábadu (28/03/2024), hodi halo detensaun ba arguidu na’in-3 durante oras 72 hodi submete ba iha prosesu primeiru introgatóriu.
Iba Prosesu primeiru introgatóriu ne’e, prezide husi juis Ersila de Jesus, Ministeriu Públiku representa husi Prokuradór, Ricardo Leite, arguidu sira hetan asistensia legál husi Defensór Públiku, Manuel Sarmento, no Huberto Alves.(*)
963 total views, 3 views today
Bele hare Video Seluk :
Subscribe to Timorpost
