DILI (Timor Post.com)—Movimentu Estudante Manufahi (MEM), lamenta no kondena tebes aktus husi oknum Polisia Militár (PM), no oknum veteranu, ne’ebe kasa komunidade sira nia karau sem lisensa. Tanba ne’e husu ba Instituisaun Defeza hasai oknum refere.
“Ami lamenta aktus hirak ne’ebé, hamate beibeik komunidade sira nia karau iha Munisípiu Manufahi, Postu Administrativu Same, Suku Betanu, Aldeia Selihasan,.” Dehan porta voz, Movimentu Estudantíl Munisípiu Manufahi, Antonio Rebelo Mendes, liuhusi Konferénsia Imprensa iha Faról, Kuarta-Feira (13/09/2023).
Porta voz Antonio hatete, kazu ida ne’e obriga komunidade ba hein loron kalan iha karau luhan, ne’e viola direitu umanu, tanba ne’e husu ministériu relevante, atu fó xamada atensaun ba oknum PM ho oknum veteranu ne’ebé halo kasa ilegál no uza tan arma nasaun nian.
“Kazu halo kasa ilegál, la’ós foin akontese, maibé akontese dala-neen (6) ona, ita lamenta no kondena tebes ho aktu ilegál sira ne’e, tanba animal ne’e komunidade nian la’ós fuik iha ai-laran, ne’ebé ba tiru tuir nia hakarak”. Nia hateten.
Nia dehan, uza arma estadu hodi tiru no kasa komunidade nia animal, ne’e krime, tanba kilat uza atu defende povu no nasaun bainhira iha ameasa laran, la’ós uza atu estraga fali povu nia animal ne’e krime.
“Ami husu ba ministériu relevante liuliu, Prezidente Repúblika, Komandu F-FDTL, Prezidente Konsellu Veteranu, Parlamentu Nasionál, PDHJ, Ministériu Defeza, atu fó xamada orientasaun, di’ak ba membru sira ho di’ak, atu labele estraga komunidade nia animal sira iha fatin-fatin.” MEM rekomenda.
Tuir informasaun husi Ministru Defeza (MF), Donasio Gomes Magalhães “Pedro Klamar Fuik hatete, agora daudauk halo ona investigasaun ba oknum ne’ebé uza arma estadu ba tiru ka kasa komunidade nia karau, iha munisípiu Manufahi.
“Ida ne’e tenke tanba hanesan sidadaun tenke hakruk ba lei. Hanesan sidadaun tenke kumpre saida mak halo. Tanba ne’e uza arma nasaun nian presiza investiga kle’an no xamada rigorozu atu labele akontese tan iha futuru mai”.
Prosesu investigasaun ne’e presiza dunik, atu hatene tanba sá lori arma estadu hodi estraga komunidade nia animal, liuliu karau sira, hodi deside tuir gia legal ne’ebé iha.
“Ita fiar katak prosesu investigasaun sei hatudu sinál pozitivu atu komunidade sira hatene motiva saida mak lori arma nasaun nian ba kasa komunidade nia karau, depois naan ne’ebé iha atu halo saida no fó ba se, presiza investiga”. Hakotu.
2,829 total views, 27 views today
