Timor Post (12/10/2020) Prezidente Forum Komunikasaun dos Valores (FKV), Eládio Faculto, Segunda (12/10) halo audiénsia ho Prezidente Parlamentu Nasionál Aniceto Guterres, hodi husu ba órgaun lejizlativu hametin nafatin demokrasia iha Timor-Leste.
Ba jornalista Eládio informa forum husu ba parlamentu atu kontinuasaun ezerse sira ninia kompeténsia tomak hodi hametin demokrasia, promove demokrasia, debate ne’ebé ho di’ak, ho entendimentu no kontinua hala’o knar tuir konstituisaun no haree kona ba asuntu sira ne’ebé ligadu ho estadu nian.
“Ami hatete ba prezidente katak forum ida ne’e, ami hakarak iha futuru sei ajuda hanesan mákina fornesedor ida, para ajuda diálogu ne’ebé estadu presiza, diálogu ne’ebé promove atu hametin demokrasia. Ami preokupasaun as ida mak ne’e ohin loron ita hotu hatene partidu polítiku sira mosu barak ne’e atu ajuda demokrasia, maibé ami nia preokupasaun mak ne’e partidu mosu la’ós atu lori problema ba povu, maibé atu hametin demokrasia,” Eládio esplika iha entrevista Segunda (12/10).
Eis deputadu ne’e akresenta ko’alia mós kona ba étika no moral, tanba iha nasaun oras ne’e mosu problema sériu mak ne’e komunikasaun publika komesa tun maka’as tanba ema ko’alia iha medsos trata malu, la respeitu malu ne’e maka’as tebes.
“Ita mós haree tratamentu komunikasaun publika ko’alia ne’e la respeitu ba malu ne’e hamenus étika moral,” Eládio hatutan.
Eis deputadu fretilín rekoñese baku rahun meza parlamentu nian foin lalais ne’e mós la ajuda demokrasia.
“Demokrasia labele simu fali rezultadu ida halo rahun sasán sira, insulta malu, hatún malu ne’e demokrasia lakohi, maibé demokrasia hakarak mak ema tenke debate ho di’ak, ema tenke diskute, analiza kritika, la simu argumentu ida ne’ebá nian maibé ho argumentu simu malu, ko’alia ba malu labele ho de’it emosaun, ódiu vingansa ne’e la ajuda demokrasia” akresenta tan.
Eládio adianta Prezidente Parlamentu Nasionál, Aniceto Longuinhos Guterres Lopes, fó resposta no fó apoiu ba inisiativa forum komunikasaun dos valores no ida ne’e tenke akontese duni.
“Resposta mak ohin exelénsia prezidente parlamentu nasional kontente no nia fó apoiu inisiativa tomak no nia hakarak ida ne’e tenke akontese duni, ” Eládio hakotu.(Jornalista : Julio Salinas Soares)
1,007 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
1
/
1987
FEDERASAUN BOXING TL REALIZA KAMPIONATU NASIONáL BA DARUAK
KRAM KONSIDERA 77 HO K2000 ILEGÁL
PRÁTIKA TREINAMENTU, PNTL KAPTURA MEMBRU PSHT NA’IN 9
1
/
1987