DILI (Timor Post)—Polisia Nasionál Timor-Leste (PNTL), liuhosi Servisu Informasaun Polisia (SIP), detein suspeitu ho naran inisial LVM, tinan 25 hosi Munisípiu Ermera, hela iha Aldeia 01 Suku Kaikoli, Postu Administrativu Vera-Cruz, Munisípiu Dili ne’ebé envolve krime jerál ba kazu baku rahun karreta no foti sasán iha Kapitál Dili.
Tuir informasaun Timor Post Online, asesu hosi portál ofisiál Ministériu Interior, Kinta (07/07), Suspeitu LVM, PNTL kaptura iha Bairru dos Grilhos no iha fatin akontesimentu suspeitu deklara nia mak baku rahun no foti duni Laptop ida iha arredores Cristo Rei, baku rahun karreta Delicious no foti Laptop no telefone ida iha area Sporting kruzamentu BNU tun ba Porto Dili, inklui telefone ida, enkuantu iha area Audian no Kulu-hun baku rahun karreta maibé la konsege foti sasán.
Hafoin halo kapturasaun, SIP diretamente entrega kedas ba SIK (Servisu Investigasaun Kriminál) Nasionál, hodi halo prosesu investigasaun no entrega ona ba Komandu Munisípiu Dili, hodi halo detensaun durante 72h, antes submete ba tribunal hodi tuir prosesu julgamentu.
Antes ne’e suspeitu LVM tama ona prizaun iha tinan 2017 no sai iha tinan 2021 tanba komete kazu na’ok iha Audian.
Operasaun ida ne’e realiza tanba halo ona koordenasaun ho autoridade judisiária kompetente no oras ne’e Komandu PNTL hatún ona diretiva ba Komandante SIP hodi intensifika buka tuir autór sira seluk ne’ebé envolve ho kazu hanesan.
1,663 total views, 6 views today
