ADVERTISEMENT

Arguidu JIG Ameasa Tama Kadeia Tinan Tolu

Orlando Oqui - Justisa
Jornalista : Beatriz Belo
Editor : Orlando Oqui
  • Share
Foto Espesiál

DILI (timorpost.com) — Ministériu Públiku (MP) reprezenta husi Prokuradór Napolião Soares da Silva husu ba Tribunál Distritál Dili (TDD) aplika Pena prizaun tinan tolu no suspende ezekusaun tinan tolu ba arguidu JIG.

Ministériu Públiku husu pena ida ne’e tanba razaun haree arguidu nia konfesa faktus provadu hotu no arguidu nia hahalok ne’e prienxe duni krime maus tratus ba kónjuje ho forma violénsia doméstika, previstu no punidu tuir artigu 1540 hosi Kódigu Penal konjuga ho artigu 20, 30 alínea a) no artigu 350 alínea a) hosi Lei Kontra Violénsia Doméstika n.007/2010, loron 07 fulan Jullu.

ADVERTISEMENT
SCROLL FILA BA NOTISIA


Tanba ne’e, Ministériu públiku husu ba iha Juis koletivu, atu aplika pena prizaun tinan tolu no suspende ezekusaun tinan tolu ba arguidu JIG.

Enkuantu, defeza ba arguidu haree faktus ne’ebé mak arguidu konfesa parsialmente katak nia halo duni, nune’e aerguidu arrepende no mós husu ona deskulpa ba iha lezada no mós lezada nia inan-aman.

Tanba ne’e, defensór husu ba tribunal atu fó pena ne’ebé adekuadu ba arguidu.

Tuir akuzasaun katak, Lezada OMV ho arguidu JIG moris hamutuk hanesan feen ho la’en iha tinan 2013, iha oan na’in-rua, ba arguidu ekonomikamente dependénsia.

Durante moris hamutuk hanesan feen ho la’en, arguidu JIG halo bei-beik agresaun fízika hasoru lezada OMV.

Katak, iha loron no fulan ne’ebé lezada haluha ona, maibé tinan 2016, hale’u oras tuku 18:00 OTL iha Bekora, Dili, arguidu JIG lori liman karuk no los tuku tuituir malu, kona iha lezada nia ulun fatuk, hasan dala 6 kona iha lezada nia ulun no tebe dala 2 kona iha lezada nia ain sorin los no karuk.

Lee Mós :
MJ Iha Ona Prosesu Reforma PSIK

Konsekuénsia direta hosi agresaun fízika ne’e, lezada hetan moras maka’as, bubu no metan iha ulun no moras maka’as iha lezada nia ain sorin los ho karuk, maibé lezada la ba halo tratamentu iha ospital.

Kauza hosi problema ne’e, tanba arguidu fila hosi serbisu fatin ho kondisaun lanu.

Iha loron no fulan ne’ebé lezada haluha ona, maibé tinan 2019, hale’u oras tuku 24:00 OTL, iha Bekora, Dili, arguidu lori liman los ho karuk tuku tuituir malu dala 5, kona iha lezada nia ulun fatuk ho kotuk laran, hafoin kaer estátua ida hodi baku kona iha lezada nia ulun fatuk.

Konsekuénsia direta hosi agresaun fízika ne’e, lezada hetan moras maka’as, bubu no metan iha ulun fatuk, moras maka’as, bubu no metan iha kotuk laran no dada iis arraska, moras maka’as, kanek no ran sai iha ulun; 8. Kauza hosi problema ne’e, tanba arguidu ho kondisaun lanu.

Iha loron 16 fulan Janeiru tinan 2022, hale’u oras tuku 04:00 OTL madrugada, iha Bekora, Dili, arguidu lori liman los basa dala 10 kona iha lezada nia ulun, lori liman tuku dala 2 kona iha lezada nia kanotak, tuku dala 1 kona iha lezada nia hirus matan, lori kapasete tuda kona iha lezada nia kidan sorin los, tuku dala 2 kona iha lezada nia matan fukun sorin los, tuku dala 2 kona iha lezada nia kabaas sorin karuk, lori liman kukun rakut lezada nia kakorok no lori sintu baku dala 4 kona iha lezada nia liman kabun sorin los ho karuk, nune’e, lezada halai sai ba liur,

Maibé arguidu duni tuir hodi kaer iha lezada nia fuuk no rasta tama ba uma laran

Lee Mós :
VPU Bobonaru Rejista durante fulan ualu Kazu violénsia 45

Konsekuénsia direta hosi agresaun fízika ne’e, lezada hetan moras maka’as iha ulun laran tomak, moras iha kanotak sorin karuk ho los, moras iha hirus matan, bubu no dada iis arraska, moras maka’as, kanek no bubu metan iha kidan, moras maka’as, bubu no metan kafuak iha matan fukun, moras maka’as, bubu no metan iha liman kabun.

Lezada ba halo tratamentu iha Centro Saúde de Comoro.

Kauza hosi problema ne’e, tanba ba festa fila ba uma ho kondisaun lanu hodi halo kedas agresaun fízika hasoru lezada.

Arguidu halo ho forma livre deliberada no konsientemente, hatene katak, halo bei-beik agresaun fízika hasoru lezada hanesan konsta.

Iha akuzasaun, nu’udar tratamentu fízika no psíkika la di’ak hasoru nia konjuze, tanba lezada hanesan arguidu nia ferik oan rasik, maski nune’e, arguidu pratika nafatin hodi konkretiza dunik ninian hakarak.

Arguidu hatene katak, nia hahalok ne’e proibidu no punidu tuir lei penal.

Tanba ne’e, Konstitui arguidu João Ivanildo Gomes da Costa Soares, nu’udar autór material ho forma konsumadu ba pratika krime maus tratus ba kónjuje ho forma violénsia doméstika, previstu no o punidu tuir artigu 1540 hosi Kódigu Penal konjuga ho artigu 20, 30 alínea a) no artigu 350 alínea a) hosi Lei Kontra Violénsia Doméstika n.007/2010, loron 07 fulan Jullu.

Hatán ba akuzasaun ne’e arguidu JIG hili direitu ko’alia katak, faktu ne’ebé mak ohin lei sai ne’e los hotu.

“Iha altura ne’ebé lezada tau status ba ha’u iha media sosiál, tanba ne’e ha’u ba hemu tua lanu, depois fila uma ha’u baku nian,” konfesa arguidu iha sala julgamentu TDD, Kuarta (17/05).

Arguidu konfesa tan, hafoin akontese tiha problema ne’e lezada deside no ba hela ho nia inan aman, depois liu tiha fulan haat hanesan ne’e arguidu ba buka tuir lezada no husu deskulpa ba lezada no mós lezada nia inan aman no promete katak sei la halo tan.

Lee Mós :
Rai Ai-meti Laran-Bekusi, Kumpre Norma Prosesu Sivíl

Arguidu mós konfesa tan, katak promete hakarak na’in-rua lezada fila fali ba balu, maibé parte família husi lezada hakarak resolve tuir kultura hafoin bele na’in-rua hamutuk fali hanesan fen ho la’en.

Enkuantu, lezada mós konfesa katak, iha altura ne’ebá arguidu baku duni nian, tanba kondisaun lanu.

“Ha’u tau status ba arguidu, tanba ha’u kaer toma nia ho feto seluk, tanba ne’e mak ha’u tau status iha Facebook, entaun nia fila husi festa ho kondisaun lanu hafoin mak baku ha’u,” nia dehan.

Lezada konfesa tan katak, arguidu nia hahalok ida ne’e, la’ós foin akontese dala ida de’it, maibé akontese dala barak ona, maibé dala no tinan mak nia la lembra ona.

Lezada haktuir, daudaun lezada ho arguidu di’ak malu ona, maibé seidauk hela hamutuk iha uma ida, tanba parte família hakarak resolve tuir kultura hafoin mak bele kontinua sira hela hamutuk.

Rona tiha parte hirak ne’e, tribunal adia hikas audiénsia julgamentu ne’e ba iha loron seluk hodi submete ba desizaun.

Audiénsia julgamentu ne’e prezide husi juiza koletivu, Maria Solena Fernandes, Ivan Suritay, Albertina da Neves Ministériu Públiku reprezenta husi Prokuradór Napolião Soares da Silva, arguidu hetan asisténsia legál husi Defensór Públiku Manuel Exposto.

 1,020 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Arguidu JIG Ameasa Tama Kadeia Tinan Tolu” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No