DILI, (timorpost.com)— Tribunál Judisiál Primeira Instánsia Dili (TJPID) hamutuk ho Ministériu Públiku ( MP), no Defesoria Públiku (DP), ohin Kuarta, (20/03) halo inspesaun direita ba fatin akontesementu iha sela komandu Polísia Nasionál Timor-Leste (PNTL), ne’ebé matebian José Bernardo mate hakotu iis ba.
Enkuantu, iha inspesaun ne’e tribunál liuhosi juis koletivu, Alvaro Freita, José Gonsalves no Jumiati Freitas, Ministériu Públiku representa husi prokuradór Aderito Tilman no Defensoria Públiku, Eustaquio Guterres, no Juvinal Dias, mak tuun direita ba halo inspesaun iha fatin refere.
Tuir defeza ba arguidu sira, Eustaquio Guterres, hatete ohin halo inspeksaun lokál krime iha sela komandu PNTL munisípiu Dili ne’e tanba ohin iha julgamentu depois perguntas husi Ministériu Públiku, Defeza no Tribunál rasik mosu dúvidas uitoan iha lokal krime ka fatin ne’ebé matebin José Bernardo hakotu iis ba iha sela komandu PNTL munisípiu Dili.
“Ha’u hanesan defeza ba arguidu sira, husu ba tribunál atu halo inspesaun lokal krime, atu nune’e Tribunál rasik mai jare fatin ida-ne’e, para depois loron ikus mai halo prosesu julgamentu karik tribunál iha koñesementu ba fatin ida-ne’e para bele halo pergunta ba iha sira”, dehan defeza ba arguidu sira, Eustaquio Guterres, ba jornalista hafoin remata inspesaun iha sela komandu PNTL munisípiu Dili, Kuarta, (20/03).
Defeza haktuir katak, nia parte laiha dúvida ruma para mosu tan pergunta ba arguidu sira, tanba Tribunál rasik mai haree direitamente akontesementu no inklui Ministériu Públiku no defeza rasik, no arguidu mós marka prezensa hodi parte sira husu kedan pergunta ba arguidu hodi responde kona-ba duvidas ne’ebé tribunál iha.
Defeza deklara tan, husi inspesaun ne’e la’os ikus ona maibé atu responde de’it dúvida balun, no tribunál sei marka fali loron balu tuir mai, hodi rona sasin sira.
Antes ne’e Tribunál rona ona deklarasaun husi arguidu na’in-2 tanba ne’e ohin molok atu ba iha prosesu inspesaun, iha julgamentu kontinuasaun ne’e tribunál deside hodi rona deklarasaun arguidu TV ne’ebé hanesan membru PNTL momentu ne’eba hein sela komandu PNTL munisípiu Dili.
Arguidu deklara katak, momentu ne’eba arguidu simu tiha vítima husi arguidu nia kolega investigasaun na’in-1, arguidu lori kedan vítima ba hatama iha sala identifikasaun no antes tama ba iha sala indentifikasaun arguidu mós halo pasa revista ba iha vítima.
Arguidu deklara tan, depois vítima tama tiha ba sala identifikasaun nia-laran, iha loraik arguidu mós xave tiha odamatan sala nian hodi sai mai iha portaun oin, dada iis fuma hela sigaru.
Depois hotu, arguidu tama fali ba iha sala identifikasaun, arguidu bolu vítima, maibé arguidu haree vítima la hatán, tanba ne’e arguidu foti xave hodi loke odamatan tama ba haree, vítima tara-an iha sela laran. Tanba ne’e arguidu kontaktu kedas ba iha nia kolega ne’ebé sira na’in-2 toma konta iha fatin refere fó hatene hodi kontaktu ba iha ambulánsia hodi tula vítima ba iha hospitál.
Arguidu deklara, nia simu vítima husi nia kolega seluk hodi hatama vítima ba iha sala identifiksaun, vítima nia kondisaun di’ak hela, no arguidu deklara la’os nia mak baku vítima maibé vítima mak uza fiu ne’ebé tabele hela iha plafon leten maka tara-an.(*)
846 total views, 3 views today
Bele hare Video Seluk :
Subscribe to Timorpost
