Dili(timorpost.com)—Governu liuhosi Ministru Transporte Telekomunikasaun (MTK, Sigla Portugés), José Agostinho da Silva, fó pose ba Grupu Traballu Jéneru no Inkluzaun Sosiál períodu 2023-2024, hamutuk ema na’in-50.
“Eventu importante ida realiza hosi Ministru Transporte Telekomunikasaun liuhosi komisaun organizadora jéneru no inkluzaun hodi pose ba Grupu Traballu Jéneru no Inkluzaun Sosiál hamutuk na’in-50”, Ministru Transporte Komunikasaun (MTK), José Agostinho da Silva, informa liuhosi nia diskursu iha salaun reuniaun MTK, Kaikoli, Segunda (17/04).
Ministru hatete, “Grupu Traballu Jéneru no Inkluzaun Sosiál” ba mandatu tinan ida (2023-2024), ho nune’e ofisialmente eziste nu’udar forsa grupu traballu iha Ministériu Transporte no Komunikasaun hodi luta ba direitu igualdade sosiál iha setór jéneru no inkluzaun transporte no komunikasaun.
Nia esplika, Traballu Jéneru no Inkluzaun Sosiál ne’ebé hamutuk ema na’in-50 hosi nasionál no munisípiu ho formadu hosi funsionáriu iha pozisaun xave iha kada diresaun nasionál ne’ebé responsavel ba planeamentu, definisaun polítika, finansas no monitorizasaun avaliasaun konforme defenidu iha artigu 2º no 3° iha diploma.
Iha oportunidade ida-ne’e, nia hakarak hato’o ba empossadus sira ne’ebé ohin hetan ona pose ida-idak bele hala’o ona nia kna’ar no responsabilidade ne’ebé atribui ona liuhosi nia despaxu nia hatún ona ba empossadu sira iha Ministériu Transporte no Komunikasaun ida-ne’e.
Tan ne’e nia parabéns ba Grupu Traballu Jéneru no Inkluzaun Sosiál ne’ebé ohin hetan ona tomada pose hein katak kontinua nafatin luta ba igualdade jéneru no inkluzaun sosiál iha Ministériu Transporte no Komunikasaun.
Iha fatin hanesan Diretór Planeamentu MTK, Marçal Pinto, hatete serimónia toma de pose ba iha grupu Traballu tinan 2023 to’o 2024 mak oinsá MTK bele eziste Grupu Forsa Traballu ida hodi implementa direitu Jéneru no Inkluzaun Sosiál ne’ebé mak sai hanesan programa nasionál ne’ebé aliña ona iha deklarasaun no planu asaun ba iha ema ho defisiénsia ba iha períodu 2021 to’o 2030.
Grupu ida ne’e la’ós foin primeira vés iha MTK, maibé eziste tinan 2021 ne’ebé kompostu hosi na’in-20, tinan 2022 aumenta tan ema na’in-30, atu nune’e iha tinan ida ne’e bele atende servisu ba iha Planu Asaun Ema ho Defisiénsia.
“Ne’ebé iha tinan ida ne’e ita númeru sa’e ba iha ema na’in-50 mak ohin simu pose, ne’e signifika katak atu fahe tan iha ekipa haat mak hanesan ICT, Transporte Públiku Seguru, Jestaun no Formasaun Transporte Maritima”, nia tenik.
Iha fatin hanesan, Sekretaria Estadu ba Igualdade no Inkluzaun, Maria Rosario Fatima, reforsa apresia ba MTK ne’ebé ho inisiativa di’ak atu bele fó biban ba iha asuntu Igualdade Jéneru iha MTK.
“Objetivu hosi toma de pose ne’e sira konsidera prinsípiu igualdade entre mane no nu’udar pillar fundamental ba estadu direitu demokrátiku ne’ebé dezigna ba Konstituisaun Repúblika Demokrátika Timor-Leste hodi promove igualdade entre mane no feto integra iha grupu jéneru no inkluzaun sosiál”, nia hakotu.
1,953 total views, 3 views today
Bele hare Video Seluk :
Subscribe to Timorpost
