ERMERA (timorpost.com)- Governu liuhusi Ministeriu Edukasaun, Juventude no Desportu (MEJD) entrega plaka no lansa eskola hamutuk 21 iha Munisípiu Ermera.
“Atividade ohin ami entrega plaka ba eskola sekundária, pre-sekundária no ensinu báziku 12 no halo lansamentu primeira pedra ba eskola 9 inklui abertura fatuk dahuluk ba edifisiu profesor sira iha eskola sekundária jeral Nino Coniz Santana Gleno,” Ministru Edukasaun, Juventude no Desportu, Armindo Maia, hateten iha Munisípiu Ermera.
Nia dehan, objetivu tau mós fatuk dahuluk ba edifísiu Profesór sira nian, ne’e atu fasilita sira hodi uza ba atende estudante sira iha prosesu parendizajen.
Edifisiu ba profesór sira ne’e kompostu husi sala 6, mak sala Diretor, sala profesór, sala resipsionista, sala GAT, sala dapur, no haris fatin.
Nia hatutan, Governu Daualuk liuhusi Ministeriu Edukasaun, Juventude no Desportu (MEJD), sei kontinua esforsu hodi kria kondisaun dignu ba profesór no estudante sira.
MEJD entrega plaka ba eskola 12 ne’ebé inagura tiha ona iha faze dahuluk iha Munisípiu Ermera, nune’e mós serimónia lansamentu primeira Pedra ba Eskola hamutuk 30 ba daruak faze territóriu laran tomak no Munisipiu Ermera hetan eskola 9.
Portantu Ministériu Edukasaun, Juventude no Desportu, entrega Plaka no inagurasaun ba eskola 12 ne’e, no lansamentu Primeira Pedra ba Eskola hamutuk 30 iha territoriu laran tomak, ne’e asina husi Primeiru Ministru, Taur Matan Ruak.
Ministru ne’e konta, durante nia mandatu hakarak atu rezolve tiha problema profesór voluntáriu sira mais ou menus 50% hosi mínimu voluntáriu ne’ebé iha tiha ona, tanba ne’e rezolve tiha profesor voluntáriu ba permanente.
Nia dehan, edukasaun kualidade iha futuru presiza investe fasilidade kadeira-meza, entermus rekursu umanu mak profesor sira tenke permanente hodi hanorin estudante.
Ikus nia mós hato’o agradesimentu ba parte hotu-hotu ne’ebé kontribui ona ba dezenvolvimentu setór edukasaun iha rai ida ne’e, nune’e kongratula mós grupu komunitáriu no kompañia konstrusaun sira hotu.
Iha fatin hanesan, Diretór Ensinu Sekundáriu Jerál Nino Conis Santana Munisípiu Ermera, Clementino Madeira, sente kontente tanba MEJD bele harii konstrusaun edifísiu profesór sira nian hodi bele fasilita hodi atende estudante sira.
Edifísiu ne’e bele fasilita ona profesór, maibé nia triste mós tanba alunu iha 200 mil resin, maibé lasamentu ba eskritóriu profesór de’it, oinsá ho alunu sira, tanba ensinu Sekundáriu Jerál Nino Conis Santana sai ona sentru ba munisípiu Ermera, tanba postu neen ne’ebé eziste iha munisépiu ne’e eskola hotu iha ne’e, la’ós ne’e de’it iha mós alunu sira balun hosi munisípiu seluk.
Nia informa, eskola ne’e mós sala aula menus tebes, entaun kada sala ida iha alunu 60 ba leten, difikulta profesor atu kontrolu estudante sira iha sala laran no mos difikulta ba estudante sira-nia konsentrasaun hodi partisipa iha prosesu aprendizajen.
Nune’e mós Reprezentante Autoridade Munisipiu Ermera, Nazário Padricio de Deus, lori komunidade Munisípiu Ermera hato’o agradesementu ba Governu Daualuk Konsitutisional, ne’ebé tau importansia liubá ema, liuliu kualidade ensenu iha Timor Leste, espesialmente ba munisípiu Ermera.
1,851 total views, 6 views today
Bele hare Video Seluk :