DILI (timorpost.com) – Tuir ajenda, ohin, Sesta (07/07), Ministra Negósiu Estranjeiru Austrália, Senadora Penny Wong, sei hala’o vizita loron ida mai Timor-Leste (TL).
Tuir komunikadu ne’ebé Timor Post asesu hosi gabinete media ofisial Ministériu Negósiu Estranjeiru no Kooperasaun (MNEK) katak, ministra ho aviaun privadu sei to’o iha Aeroportu Nicolau Lobato iha oras tuku 08:15 Oras Timor-Leste (OTL).
Durante vizita, Ministra Negósiu Estranjeiru Austrália, Senadora Penny Wong sei hasoru malu ho Prezidente Repúblika, José Ramos Horta, Primeiru Ministru Repúblika Demokrátika Timor-Leste, Kay Rala Xanana Gusmão no Ministru Negosius Estranjeiru no Kooperasaun, Bendito dos Santos Freitas.
“Ho Senadora Penny Wong nia prezensa iha Timor-Leste, bele loke liután oportunidade ba kooperasaun ida ne’ebé boot liután ho benefísiu entre Timor-Leste no Australia iha área ekonomia no atu hametin liután relasaun entre rai rua ne’e,” sita komunikadu ne’e.
Komunikadu ne’e mós sita katak, parte rua sei diskute asuntu sira ne’ebé halo parte ba interese mútua iha rejiaun no mós mundu.
Austrália sai nu’udar país doadór ida ba Timor-Leste, no apoiu mós programa balun, inklui treinamentu ba Polisia Nasionál Timor-Leste (PNTL).
Tuir oráriu ne’ebé iha, Ministra Penny Wong sei dezloka hikas hosi Timor-Leste iha loron ne’ebé hanesan. Senadora Penny Wong nian vizita ikus mai Timor-Leste molok vizita ida ne’e, hala’o iha Setembru 2022.
2,394 total views, 6 views today
Bele hare Video Seluk :
Subscribe to Timorpost
