DILI (Timor Post) – Ministra Negósiu Estranjeiru no Kooperasaun (MNEK), Adaljiza Magno, informa sidadaun timoroan sira ne’ebé ba ilegál iha Alemaña ne’e agora ema investiga hela sira.
“Ita problema oioin de’it ba sidadaun sira ne’ebé ba servisu iha rai li’ur, agora sira iha Alemaña ne’e ema investiga hela sira,” nia hateten iha Palásiu Governu, Kuarta (10/08).
Nia dehan, agora embaixada iha Brucelas mak haree hela kona-ba ida ne’e, tanba sira ba servisu ilegál no hetan problema iha ne’ebá.
“Ema investiga hela sira, ita tauk orsida ema deporta sira tanba kontra ema nia Lei ita la hatene,” deklara nia.
Nia hateten, sidadaun sira ne’e antes Governu ko’alia ona ho sira atu buka dalan sira fila, maibé sira rasik mak lakohi fila no husu fali Governu atu buka fali servisu ba sira iha Alemaña.
“Ba sira barak ne’ebé agora ba toba de’it iha jardín no estrda públiku iha Portugál ne’e ami ko’alia ho sira atu ba rejistu iha Embaixadór Timor-Leste iha Portugál hodi bele ajuda sira, maibé sira balun lakohi no balun de’it mak hakarak ba rejistu,” hateten nia.
Tanba ne’e nia husu ba sidadaun sira liu-liu ba joven sira atu tetu antes atu arranka ba buka servisu iha Europa, tanba sira barak ema mai bosok sira halai tuir ba de’it.
“Kuandu laiha serteza lalika ba tanba sira ema mai bosok ba de’it no ba iha ne’ebá halo susar sira nia an de’it, bele ba maibé tuir prosesu normál no haree dokumentu kompletu ona bele ba,” nia hakotu.
1,158 total views, 3 views today
