DILI (timorpost.Com) — Embaixadór Timor-Leste ba Mosambike, Francisco Miranda Branco, ohin simu tan diplomasia husi Prezidente Repúblika, José Ramos Horta, atu sai hanesan Embaixadór bá Angola ho Áfrika do Súl.
“Misaun diplomátika Repúblika Timor-Leste iha Mosambike tuir desizaun Konsellu Ministru akumula mós misaun diplomátika ba Áfrika do Súl ho Angola,” Embaixadór Francisco Branco, hatete hafoin asinatura termu posse Embaixadór bá Angola ho Áfrika do súl, iha Palásiu Prezidensiál, Bairru-Pité, Segunda (19/09).
Iha tempu ne’ebá lapsu, entaun atu prienxe lapsu ida ne’e Prezidente Repúblika dekreta fila fali Áfrika do Súl ho Angola hanesan misaun diplomátika ne’ebé Timor-Leste ninia rezidénsia iha Mosambike halo kobertura mós.
Áfrika do Súl país importante iha G20 no Angola mós importante, uluk Timor-Leste iha administrasaun diplomátika iha nasaun rua ne’e, maibé Timor-Leste kansela tiha misaun diplomátika iha nasaun rua.
“Agora desizaun husi Estadu ita-nia misaun diplomátika ne’e iha Mosambike ne’e halo kobertura mós ba nasaun rua ne’e,” Embaixadór Francisco relata.
Nia dehan, diplomasia ida ne’e, diplomasia ekonomia, tuir nasaun nia polítika agora, misaun diplomátika iha mundu hotu nia misaun mak ida ne’e, halo mobilizasaun rekursu, atu investidór sira mai Timor-Leste.
“Agora tuir ami-nia haree, iha area barak liuliu iha area Turizmu, Infraestrutura ida ne’e mak barak liu. Kona-ba mandatu ne’e depende desizaun polítika nasionál,” nia informa.
Enkuantu mensajen Prezidente Repúblika, José Ramos Horta husu servisu di’ak liu tan hodi mobiliza rekursu atu bele mai investe iha Timor-Leste. Tuir oráriu Embaixadór sei dezloka ba Mosambike, iha Kuarta (21/90).
3,854 total views, 3 views today
Bele hare Video Seluk :
Subscribe to Timorpost
