DILI—Emprezáriu Timoroan, Ricardo Nheu ho Rogério Tiago Lobato, halo kooperasaun entre empreza internasionál hosi Polónia, atu rekruta Timoroan hamutuk rihun-atus-lima (500), hodi ba servisu iha tinan ne’e.
Eis Ministru Interior (MI), Rogério Tiago Lobato, hatete, hafoin simu delegasaun internasionál hosi Polónia iha Aeroportu Internasionál, Prezidente Nicolau dos Reis Lobato, Komoro, Kuarta (12/04).
“Fulan balun ba kotuk, sira Polónia presiza ema rihun-atus-ida, maibé agora daudaun hakarak rihun-atus-lima, klaru ke Timor labele haruka rihun-atus-lima ba, maibé ita buka oinsá sira ne’ebé hakarak ba hadi’a sira nia moris no manan osan ba sira nia família iha ne’e”, nia hateten.
Nia esplika, servisu iha Polónia liuliu iha area ospitalidade, indústria, restaurante, lojístika no agrikultura, husi area servisu sira ne’e, hanoin bele kapasita Timoroan sira, nune’e bele investe fali iha rai doben Timor-Leste.
Timoroan sira ne’ebé iha inisiativa, atu ba hetan kedas vistu traballu no sira selu de’it billete to’o iha Bali (Indonézia) no husi Bali ba Polónia empreza mak sei selu. Bainhira Timoroan sira servisu ona mak foin bele devolve fali osan ba empreza sira ne’ebé haruka ba.
“Ami mós buka oinsá, sira to’o iha ne’ebá hela fatin, han buat sira ne’e hotu, ne’e mak loron balun tan, ami sei asina kontratu ida ho sira hodi garantia fasilidade sira”, nia promete.
Emprezária Polandiana, Catarginha Tamara, mak responsavel ba Timoroan sira ne’ebé atu ba servisu iha nasaun ne’e. Timoroan barak mak hakarak servisu iha nasaun seluk, liuliu iha Polónia. Iha nasaun ne’e mós saláriu mínimu ba traballadór sira mak 800.00 USD kada fulan, kuandu iha vontade servisu empreza sira sei hasa’e saláriu.
Entaun, atu labele difikulta Timoroan sira ne’ebé hakarak ba servisu iha nasaun ne’e, presiza iha kooperasaun di’ak ho empreza no Embaixadór Polónia iha Jakarta (Indonézia), nune’e labele abandona Timoroan sira, bainhira to’o iha fatin destinasaun.
Entretantu, Emprezáriu Timoroan, Ricardo Nheu, hatete, delegasaun internasionál sira mai hodi hasoru mós Governu Timor-Leste no entidade relevante sira, hodi haree no diskute kona-ba investimentu iha area turizmu no indústria. Tanba iha empreza tolu mak sei halo kooperasaun ho país Timor-Leste.
“Sira husi Polónia mai atu survey, hodi sira halo investimentu iha ne’e, espesífiku liu iha area indústria no turizmu, ne’ebé ita konvida sira mai haree iha semana ida ne’e nia laran”, nia hakotu.
4,743 total views, 6 views today
Bele hare Video Seluk :
Subscribe to Timorpost
