DILI (timorpost.com) – Prezidente Camâra Comércio Industria (CCI), Munisípiu Ermera, Luis Tilman, husu ba emprezáriu Timoroan sira labele dependente ba Governu, maibé tenke loke indústria manufaktur rasik.
“Emprezáriu labele dependente liubá obra Governu nian, maibé hosi osan ne’ebé emprezáriu sira iha ne’e koko para loke industria manufaktur para bele dezenvolve ita nia setor privadu ne’e hodi la’o ho di’ak”, Prezidente CCI munisipiu Ermera, Luis Tilman hateten ba Timor Post iha Hotel Timor, Tersa (20/09).
Tuir eis kandidatura Prezidente Repúblika ne’e katak, setor privadu dependente liu ba obra Governu ne’e la’ós la di’ak, maibé Governu mai ne’e ho ninia planu rasik depois kada tinan lima Governu troka malu entaun ida-idak mai ho ninia polítika rasik.
Nia hatutan, emprezariu sira depende ba Governu ne’e iha vantajen no mós desvantajen, tanba kuandu Governu ida sa’e bele halo emprezariu sira kontente, maibé bainhira tun fali no Governu ida fali mak sa’e ne’e bele halo emprezariu sira ladùn kontente.
“Tanba ne’e ha’u hanoin hanesan empreza ita tenke hanoin ba buat rua, katak hosi osan ne’ebé ita iha koko para loke industria manufaktur nune’e bele fó servisu ba ita nia sidadaun rasik”, nia hateten.
Nia hatete kestaun ne’e tanba sidadaun Timoroan sira ba buka servisu iha Australia, Inglatera, Korea no nasaun sira seluk ne’e tanba iha rai laran laiha industria.
“Maibé ita hein tok polítika Governasaun tuir mai, tanba setor privadu ne’e parseria ho Governu ka lae, ne’ebé orasida depende hosi gaya jemput bola ne’e, katak bola ne’e iha sé nia ain”, nia dehan tan.
Maibé mensajen hanesan prezidente CCI munisipiu Ermera katak, nafatin fó konfiansa ba setor privadu sira liuliu emprezariu sira iha munisipiu Ermera para bele hamutuk dezenvolve nasaun ne’e liuhosi setor ekonomia nian.
2,712 total views, 3 views today
Bele hare Video Seluk :
Subscribe to Timorpost
