DILI, (timorpost.com)— Governu Korea liuhosi nia Ajénsia Kooperasaun Internasionál Korea (KOICA, sígla Inglés) servisu hamutuk ho Ministériu Edukasaun, Ministériu Saúde no Organizasaun Mundiál Saúde (OMS) hodi promove programa kuidadu saúde primária ba Eskola Báziku Sentrál (EBS) 10 Dezembru, Kumoro, Dili.
Sekretáriu Estadu Ensiñu Sekundária Jerál no Ensiñu Tékniku Vokasionál, Domingos Lopes Lemos, hatutan, kriasaun programa kuidadu saúde primária importante hodi garante moris di’ak no dezenvolve integradu ba labarik iha idade eskolár, saúde no kualidade edukasaun, ida-ne’e mak prioridade Governu Konstituisionál da-IX dezenvolve sosiedade sustentável no devér atu garantia katak labarik sira iha asesu ba edukasaun no saúde ne’ebé di’ak.
“Inisiativa ida-ne’e kria liuhosi servisu hamutuk entre Ministériu Edukasaun ho Ministeriu Saúde atu fó nafatin saúde ne’ebé konfortável no seguru ba estudante sira, nune’e kuidadu saúde primária, monitorizasaun nutrisaun no mós edukasaun ba saúde. Prezensa inferméira iha eskola sei kontribui detesaun sedu husi problema saúde nian, promosaun ba kostume saudável ba labarik, família no kria ambiente eskola ne’ebé saudável liu, sala ne’ebé kria ba estudante sira atu kuidadu sira nia saúde no moris di’ak”, Sekretáriu Estadu Ensiñu Sekundária Jerál no Ensiñu Tékniku Vokasionál, Domingos Lopes Lemos, informa ba jornalista sira iha salaun EBS 10 Dezembru, Kumoro, Kuarta, (21/02).
Nia hatutan, saúde mak riku-soin ne’ebé tenke kuidadu loron-loron, profesór no inan-aman sira ni kolaborasaun mós sai fundamentu ba susesu programa kuidadu saúde primária.
Ikus liu, nia hato’o mensajen ba EBS 10 Dezembru ne’ebé iha tinan ida-ne’e hetan oportunidade di’ak husi KOICA ne’ebé iha ona análiza profundamente ba situasaun ne’ebé eskola infrenta, no merese duni hetan oportunidade hanesan ho eskola sira seluk hetan.
Nia mós husu ba parte eskola husi diretór to’o estudante iha eskola refere atu tau-matan no uza ho kuidadu apoiu ne’ebé parséiru sira oferese.
Iha fatin hanesan reprezentante OMS, Arvind Mathur, afirma, inisiativa husi lansamentu ne’e integra ba programa ida hanaran say no to 5S (Starvation, Skin infection,Soil transmited heminthiasis, Smoking and Surgary drinking/alkohol) ka dehan lae ba 5S (Hamlaha, Infesaun kulit, Moras transmitida husi lombriga rai, Tabaku no Konsumu bebidas midar ka alkolika), sira ne’e hotu programa ne’ebé hetan suporta husi KOICA servisu hamutuk ho OMS, Ministériu Saúde no Ministériu Edukasaun.
“Projetu ida-ne’e ho inisiativa harii sala saudável iha eskola sira ne’ebé hetan apoiu orsamentu husi KOICA ho totál $ 3.6 milloens ba projetu tomak, no ida-ne’e sai parte ida husu projetu tomak ne’e rasik. Bainhira OMS servisu hamutuk ho parséiru sira, sira halo advokasia, la’os de’it atu harii fatin ka sala saudável ne’e, maibé atu asegura nesesidade sira hanesan, bee-moos, sanitasaun bele to’o iha eskola ne’e, nune’e fó mós apoiu tékniku ba parséiru sira, nune’e eskola ne’ebé eziste bele seguru mós husi susuk ka buat ne’ebé bele fó impaktu ba saúde”, nia esplika.
Nia hatutan, nune’e bainhira tempu udan estudante sira mós bele hatene prátika oinsá taka bidon-matan atu susuk labele tolun, tamba ne’e liuhosi lansamentu ida-ne’e atu fó hatene ba estudante sira oinsá kuidadu saúde no sira mós bele hatene katak sira-nia eskola sai hanesan promosaun saúde.
Programa ida-ne’e nia tarjetu sei harii iha eskola hotu iha teritóriu laran, maibé ba dauduk ne’e sei estabelese iha eskola 12, hafoin ida-ne’e ho komitmentu husi parséiru sira hatudu nia susesu depois mak sei estende tan ba eskola hotu iha teritóriu laran.
Entretantu Diretór eskola EBS 10 de Dezembru, Nicolau Amaral, agradese ba parséiru sira ne’ebé fó apoiu ba eskola EBS 10 Dezembru liuliu lori projetu pilotu ne’e ba eskola refere.
“Maske iha estabelesimentu ensiñu báziku barak maibé parséiru sira bele hili ami-nia eskola sai fatin ida ba progarama saúde primária, ida-ne’e hanesan oportunidade di’ak ida, nune’e ami hotu apresia, tamba bainhira ami moras la presiza ba to’o ospitál, ospitál iha kedas ami nia eskola”, Diretór eskola EBS 10 Dezembru, Nicolau Amaral, informa.
Iha oportunidade ne’e, Diretór eskola EBS 10 Dezembru ne’e mós hato’o kondisaun ne’ebé daudauk ne’e eskola refere infrenta mak hanesan sala profesór kondisaun ladi’ak ona no salaun mós uza ba prosesu aprendisajen.(*)
3,792 total views, 3 views today
Bele hare Video Seluk :
Subscribe to Timorpost
