GLENO (timorpost.com) – Ministériu Edukasaun (ME) liuhusi Institutu Nasionál de Formação de Docentes e Profisionais da Educação (INFORDEPE) distribui sertifikadu ba profesór sira ne’ebé tuir formasaun lingua Portugés nivel 1-A2 durante tinan ida.
“Ita hamutuk iha fatin hodi distribui sertifikadu ba profesór na’in-93 kompostu husi pre-eskolár no ensinu sekundária privadu no públiku ne’ebé tuir formasaun lingua Portugés durante tinan ida termina formasaun refere iha fulan kotuk ohin ita distribui serttifikadu ba profesór sira”, prezidente INFORDEPE, Domingos Martins, hateten ba jornalista sira iha eskola ensinu báziku sentrál 10 de Abríl 99 Gleno munisípiu Ermera, Sesta (29/09).
Prezidente INFORDEPE ne’e relata, profesór hirak ne’e kompostu husi profesór ensinu báziku sentrál husi postu administrativu Railaku no postu administrativu Ermera maka termina sira nia formasaun lingua Portugés iha nivel 1-A2, maibé formasaun sei kontinua ba nivel 1.B2.
Nia dehan, formadór ne’ebé fasilita formasaun ba profesór sira ne’e husi 13 no mós sira servisu hamutuk ho parseiru governu Portugal liuhusi Institutu Camoes hodi fasilita formasaun lingua Portugés ba profesór sira hodi eleva sira nia koñesimentu kle’an liután iha matéria hotu hodi tranzmite siénsia ba estudante sira ho kualidade.
Enkuantu, formasaun refere durante 120 oras no hetan apoiu másimu husi Ministériu Edukasaun liuhusi embaixada Portugal no Institutu Camoes hamutuk ho INFORDEPE hodi fasilita formasaun ba profesór sira ho lian Portugés hodi nune’e profesór sira bele ko’alia no bele hanorin ho lian Portugés.
Maibé, sei kontinua formasaun nivel B2 ba profesór hamutuk no formasaun ne’e importante tebes ba profesór ensinu pre eskolár to’o ensinu sekundária privadu no públiku iha territóriu laran tomak hodi eleva koñesimentu lian Portugés nian.
Iha sorin seluk, diretór edukasaun munisípiu Ermera, Eduardo Martins, informa, serimónia distribui sertifikadu ba profesór ensinu báziku sentrál hamutuk 93 kompostu postu administrativu Railaku no postu Ermera
Nia dehan, profesór sira tuir formasaun durante tinan ida iha nivel 2-A2 termina iha fulan kotuk ohin sira simu ona sertifikadu apresiasaun tanba ne’e husu ba profesór sira ne’ebé tuir formasaun lingua Portugés ne’e tenke pratika liuhusi konversa ho estudante iha sala laran.
“Ha’u husu ba profesór atu hanorin estudante sira iha sala laran ho lingua Portugés iha matéria hotu-hotu atu nune’e estudante sira bele komprende oinsá estudante sira bele ko’alia bele lee no bele hakerek Portugés ho di’ak hodi garante kualidade edukasaun iha futuru”, nia hateten.
Nia dehan, lingua Portugés ne’e importante tebes sai identidade Timor nian entaun presiza promove liuhusi prosesu aprendizajen iha sala laran, atu nune’e sira aprende liután lingua Portugés hodi koko ko’alia.
Ikus, diretór munisípiu ne’e husu ba INFORDEPE servisu hamutuk ho embaixadór Portugal liuhusi Institutu Camoes hodi kontinua formasaun ne’e ba oin hodi nune’e profesór sira ne’ebé seidauk tuir formasaun lingua Portugés sira kontinua fali tuir fali formasaun refere hodi hasae sira nia koñesimentu no abilidade iha lingua nian.
Iha fatin hanesan, formandu Angelmo das Neves sente kontente tanba partisipa formasaun lingua Portugés durante tinan 1 nia laran bele aumenta nia kapasidade no abilidade iha siénsia oinsá hanorin estudante sira ho lian Portugés iha prosesu aprendizajen iha sala laran ho kualidade.
“Ha’u tuir formasaun durante tinan ida aprende ona lingua Portugés oinsá uza tempu prezente, futuru, pasadu oinsá atu koloka termus linguajen ho di’ak uza tempu ho di’ak hodi nune’e estudante sira bele komprende matéria ho lingua Portugés, tanba ha’u garante ba futuru sei transforma siénsia ba estudante ho lian Portugés,” nia dehan.
2,166 total views, 3 views today
Bele hare Video Seluk :
Subscribe to Timorpost
