DILI-Ministériu Edukasaun Juventude Desportu (MEJD) iha tinan ne’e sei implementa programa Eskola Iha Uma ba iha munisípiu haat (4).
“Iha tinan ne’e ami sei implementa programa eskola iha uma iha munisípiu, Bobonaru, Baukau, Dili no Ermera, hodi fasilita estudante sira bele aprende matéria no prepara sira nia mentalidade hodi hakat ba eskola ensinu primária”, Ministru Edukasaun Juventude Desportu, Armindo Maia, hateten ba Timor Post hafoin enseramentu lansa video mundu ba labarik iha Timor Plaza, Sábadu (15/04).
Ministru ne’e esplika, programa hirak ne’e implementa tanba servisu hamutuk ho parseiru liuhusi governu Nova Zelándia no ajénsia internasionál no Ministériu Administrasaun Estatál (MAE) no autoridade lokál sira.
Nia dehan, programa eskola ba uma ne’e foka liubá labarik idade tinan 5-7 maka partisipa hodi hasae sira nia koñesimentu di’ak hodi nune’e prepara sira nia mentalidade ne’ebé di’ak hodi ne’e bele hakat ba eskola ensinu báziku.
Aleinde ne’e, halo implementa programa refere iha munisípiu haat iha futuru nafatin kontinua implementa programa refere iha munisípiu tolu hanesan, Lautem, Ainaru, Kovalima iha tinan 2024 nia laran.
Iha futuru sei rekruta tan profesór hamutuk 100 kada munisípiu ida-idak tuir nesesidade eskola ne’ebé implementa iha baze hodi hanorin estudante sira ne’ebé eskola iha uma.
Nune’e mós, embaixadór Nova Zelándia iha Timor-Leste NZ,SE. Philip Hewit promete prontu atu suporta MEJD iha parte hotu-hotu liuliu ba eskola iha uma no ajuda fasilita modernu hodi fasilita setór edukasaun iha Timor-Leste ho kualidade iha futuru hodi kontribui ba rai doben Timor-Leste.
Tuir nia eskola pre-eskolár ne’e importante tebes ba labarik idade ki’ik sira aprende edukasaun iha baze hodi prepara sira nia an sai mentalidade ne’ebé di’ak hodi hakat ba eskola primária no pre-sekundária no sekundária.
“Tanba ne’e ami nafatin kontinua hodi suporta no apoiu material no fasilidade ba iha ministériu edukasaun hodi oferese ba profesór sira hodi fasilita no hanorin estudante sira liuliu labarik idade ki’ik sira’, embaixadór promete,” nia hateten.
2,804 total views, 3 views today
Bele hare Video Seluk :