Dili (Timor Post)—Governu aumenta sentru votasaun iha eleisaun prezidensiál 2022 no parlamentar 2023. Desizaun ne’e foti tanba taxa eleitór pursentu 19 mak la partisipa eleisaun iha tinan 2018.
Ministru Administrasaun Estatal (MAE), Miguel Perreira de Carvalho esplika, ho rajaun iha leten maka nia parte hasa’e sentru votasaun 885 ba 1.200.
“Ita sei aumenta tan sentru votasaun no estasoens de votu iha territóriu Timor-Leste tomak. Purtantu aumentu porvolta 27 pursentu husi sentru votasoens tinan 2018 nian,” Miguel ba Jornalista sira iha Palásiu Prezidesniál Bairo-Píte, Díli, Segunda (13/12/2021).
Ho aumentu sentru votasaun ne’e sei aumenta mos estasaun votu husi 1.160 (2018) ba to’o 1.500 iha eleisaun rua mai.
STAE no Komisaun Nasionál Eleisaun hahú iha loron 1, fulan Jullu tinan ne’e to’o iha loron 14, fulan janeiru tinan oin, kontinua halo resensiamentu eleitorál nomós atualizasaun baze dadus ba eleitór sira ne’ebé sei tuir votasaun iha 2022-2023.
Iha resensiamentu no atualizasaun baze dadus, STAE rejista ona eleitór hamutuk rihun 850, kompara ho eleitór iha tinan 2017 to’o ohin loron nian, aumentu por volta eleitór rihun 66.
“Ita-bo’ot sira hatene katak, iha tinan 2017 ne’e eleisaun iha tempu ne’eba eleitores sira iha tempu ne’eba iha 784.286 mais ikus liu dadus ne’ebé mak STAE fó sai depois de halo resensiamentu atualizasaun baze de dadus rejista ona eleitores hamutuk rihun 850.487 eleitores iha aumentu de kompara ho leitores 2017 to’o ohin loron nian, iha tan aumentu por polta 66.202 eleitores ne’ebé iha eleitores aumenta” tenik nia
No resensiamentu atualizasaun baze dadus iha diáspora rejista ona eleitór rihun 7 resin. Governu mós konklui ona rekrutamentu ba Brigadista sira hamutuk rihun 200, no rekruta Ofisiais Eletorais rihun 15, atu sevisu iha sentru no estasaun votasaun sira. (cao)
1,910 total views, 3 views today
Bele hare Video Seluk :