DILI(Timorpost)–Durante fulan Maiu tinan ne’e, Sentru Saúde Komoro (SSK), rejista moras kulit hamutuk 1,425, moras ne’e kauza husi bee fo’er.
“Iha fulan Maiu sentru saúde Komoro rejistu moras kulit ne’e hamutuk 1,425, tanba kauza husi bee fo’er”, informa Xefe SSK, Emilia Ayati de Sousa ba Jornalista iha knaar fatin Komoro, Tersa (20/06).
Nia hatete, moras kulit ne’e impaktu husi rai rahun no bee fo’er bainhira udan monu rai entaun afeta ba labarik sira, dala ruma labarik sira halimar bee fo’er no iha fatin balu bee menus entaun fó impaktu ba moras kulit no diaria.
Alende ne’e, kazu ne’ebé aas mak Infeksaun Respiratoriu (ISPA) ne’e hamutuk 6,509, tuir fali moras diaria 144 inklui moras seluk hanesan asidente no pneumonia.
Maibé, kada tinan fulan SSK Komoro sempre rejistu moras aas mak ISPA, Kulit no Diaria, tanba kauza husi rai rahun no bee fo’er.
Xefe ne’e esplika, kazu ISPA kauza husi mudansa klimátiku, bainhira tempu malirin ne’e efeta ba pasiete hanesan inus been, mear no dada iis, ne’e afeta barak liu ba labarik no ema boot ho idade adultu.
Nia hatete, atu prevene husi moras ne’e, tenke uza maskara hanesan prevensaun simples.
“Sei karik ema ne’ebé mear tenke taka ibun kuandu la uza maskara, maibé kuandu uza maskara di’ak liu tan, moras kulit ne’e tenke haree bee moos ne’e importante, fase liman no ain uza bee moos, haris tenke uza sabaun”, nia hakotu.
Antes ne’e, Xefe Sentru Saúde Formoza, Jaime dos Reis Belo informa, durante Fulan 4 hahú husi Fulan Janeiru to’o Fulan Abríl tinan ida-ne’e Sentru Saúde Formoza rejista moras ISPA hamutuk 5,168.
Tuir Xefe Sentru Saúde Formoza, Jaime dos Reis Belo hatete, durante Fulan haat ne’e kazu ne’ebé aas iha sentru saúde Formoza mak hanesan moras ISPA 5,168, Diarea 457, moras kulit 422, asidente trafiku 120, no Dengue hamutuk 30.
“Husi moras sira ne’e kazu sira ne’ebé mak grave liu halo transferénsia ba HNGV no sira ne’ebé mak moras kmaan, entaun sira mai simu de’it ai-moruk depois sira fila kedas ba uma”, dehan nia iha Sentru Saúde Formoza, Segunda (29/05).
Nia dehan, iha sentru saúde Formoza mós iha sala internamentu hodi halo observa durante 24 oras, depois liu loron tolu mak halo transferénsia ba iha Hospital Nasional Guido Vladares (HNGV).
Agora daudaun Ai-moruk sufisiente maibé iha item balun mak stock out hanesan anti-biotiku balun.
2,898 total views, 3 views today
Bele hare Video Seluk :
Subscribe to Timorpost
