DILI (Timor Post) — Parlamentu Nasionál (PN), kestiona kona-ba atendimentu iha Hospital Nasionál Guido Valadares (HNGV) ladauk rasionál, nune’e presiza masimiza profisionálidade.
“Ita hatene durante ne’e seguransa sira, to’o ba pesoál saúde sira halo atendimentu ho karakter dés-estimadu ba pasiente ne’ebé moras,” dehan Deputada hosi Bankada Fretilin, Helena Martins Belo, iha PN, Kinta (01/09).
Nia dehan, nu’udar órgaun soberania daruak, ne’ebé reprezenta povu, sente triste bainhira ospitál nasionál ida halo atendimentu ba pasiente sira ladún rasionál.
Tanba ne’e PN husu ba Ministra Saúde (MS), ho nia ekipa tomak, oinsá atu halo lalais junta mediku ida ho karakter urjente atu halo transferénsia ba pasiente ne’ebé gravidés sira ba Indonézia ou Singapura.
“Fiar katak prosesu ida ne’e hosi ministériu relevante liuliu Ministériu Saúde, bele aselera lalais, tanba atendimentu ida ne’e asegura vida umanu”, nia rekomenda.
Nia hatete, MS tenke hadi’a jestaun atendimentu hosi pesoál saúde no seguransa ne’ebé iha arredores fatin baixa sira nian, atu halo atendimentu ho espíritu rasionál bainhira halo ezaminasaun ba pasiente ho nia família sira.
“Ha’u rasik kontakta ho Diretór HNGV nian, ha’u fiar sei halo mudansa ba sistema ne’ebé iha, tanba ema moras ka kanek mai presiza halo atendimentu ho rasionál, ita labele hasoru emosaun ho kanek, posivel atu kura”, nia subliña.
Tanba ne’e nia repete, MS no mós Diretór sira ho nia ekipa tomak, atu halo mudansa ba jestaun atendimentu ida ne’ebé ho karakter rasionál. Enkuantu, laiha mak sei nafatin hamosu deskontentamentu ba ema hotu, tanba atu la’o ba ema profisionál presiza halo mudansa hosi karakter ki’ik ba boot.
1,737 total views, 6 views today
Bele hare Video Seluk :
Subscribe to Timorpost
