DILI (TIMORPOST.COM)– Funsionáriu sira hosi Servisu Apoiu Sosiedade Sivil no Auditoria Sosial (SASCAS) ho Universidade Nasionál Timor Lorosa’e (UNTL) halo doasaun raan iha Banku de Sangue Hospital Nasionál Guido Valadares (HNGV) hodi tulun no apoiu pasiente sira ne’ebe prezisa raan.
Xefe Departamentu Banku de Sangue iha HNGV, Claudio Quintão, hatete, ohin (horisehik) realiza atividade doasaun raan ne’ebe envolve funsionáriu sira hosi SASCAS no UNTL mak ba halo doasaun raan.
“Liuhosi atividade ida ne’e, ha’u hanoin sira fó no apoiu ona raan iha ohin (horisehik) ne’e, atu bele suporta ona stock out iha Banku de Sangue iha HNGV ne’e,“ Claudio hateten ba jornalista sira hafoin remata atividade halo doasaun iha edifisiu CVTL iha Formoza, Tersa (14/11/2023).
Nia dehan, funsionáriu sira hosi SASCAS no UNTL ne’e iha vontade di’ak ho fó no aumenta tan raan ne’ebé di’ak liután iha nune’e bele suporta ba pasiente sira ne’ebé mak oras ne’e prezisa tebes raan.
“Hanesan ohin ha’u dehan, esperansa boot karik mak sira barak, tanba sei halo teste oi-oin, parte selesaun, laboratoriu ba sira nune’e espera katak bele garante ba stock raan ne’e iha loron tuir mai,” nia hatutan.
Tuir nia, tarjetu ida ne’e besik na’in-20 resin, maibé orsida mak sei halo iha prosesu selesaun mak haree nain hira mak liu no nain hira mak raan prontu atu fó ba pasiente sira.
“Programa planu ba semana oin mai no semana ida ne’e sei iha atividade hanesan ne’e, ne’ebé sei hala’o iha semana oin mai,” nia afirma tan.
Entretantu, Diretór Ezekutivu SASCAS, Edvin Duarte Soares Noronha, hatete, halo doasaun raan ne’e tanba parseiru ho CVTL iha programa ida atu apoiu CVTL halo kolesaun raan ba ema hotu.
“Iha fulan Janeiru mai to’o agora CVTL ho SASCAS liuhosi apoiu fornese ona hamutuk 400 kantun plastiku,” nia hateten.
Diretór SASCAS ne’e esplika, CVTL no Banku de Sangue hetan apoiu husi SASCAS mak halo doasaun raan. Tanba hot-hotu hatene katak Hospital Nasionál agora daudauk raan menus, ne’ebé pasiente barak tebes, loron-loron sira prezisa apoiu raan.
Tanba ne’e, SASCAS haree CVTL mós hanesan fatin di’ak ida oinsá halo atividade ida ne’e. Tanba ne’e mak SASCAS apoiu raan ba CVTL.
“Ohin (horisehik) SASCAS apoiu porvolta 38 kantun palastiku ba CVTL no Banku de Sangue hodi tulun ita nia pasiente sira, tanba ho raan turuk ida bele salva ita nia pasiente sira ne’ebé daudauk ne’e presiza los ita nia raan,” nia hateten.
2,214 total views, 3 views today
Bele hare Video Seluk :
Subscribe to Timorpost
