BOBONARU-Partidu Kmanek Haburas Undade Nasional Timoroan (KHUNTO), fasilita kartaun eleitoral no pasaporte ba sidadaun Indonesia balun.
Iha ambitu kampaña aberta Partidu CNRT nian iha Kampu Fubebol Maliana, Kinta (11/05), sidadaun Indonesia ne’ebé hetan kartaun eleitoral ho pasaporte, Amelia Pereira, sa’e ba palku leten hodi fó sasin, katak Partidu KHUNTO fasilita eleitoral ba sira, para to’o tempu votasaun, sira tama husi Indon1sia mai vota iha Timor-Leste.
“Ami hela iha Indonésia, momentu ne’e ami tama mai haree família iha Timor-Leste, komu ami laiha kartaun eleitoral, ne’ebé sira tawar mai ami, atu halo fodik kartaun eleitoral ho pasaporte, mais to’o tempu vota, ami tama mai vota ba sira-nia partidu KHUNTO”, nia deklara perante militante, simpatizante no apiante sira.
Nia dehan, sira barak loos mak hetan kartaun eleitoral ho pasaporte, maibé balun agora dadaun iha hela Atambua-Indonésia.
“Ami barak loos mak hetan kartaun eleitoral, balun la mai, ohin ami-na’in rua mak mai, ami kuaze ema ruanulu liu”, nia informa.
Relasiona ho aktu ne’e, Prezidente Partidu CNRT, Kay Rala Xanana Gusmão, konsidera Partidu KHUNTO la merese sai Partidu, tanba ne’e husu ba Komisaun Nasional Eleisaun (CNE sigla portugés) ho Prezidente Repúblika, tenke haree ba situsaun ida ne’e.
“Ida ne’e Partidu KHUNTO hatudu loos katak la merese sai partidu, CNE ho Prezidente Repúblika tenke haree ba situasaun ida ne’e, tanba timoroan atu ba trata pasaporte, dehan pasaporte laiha, keta halo ba sira fó hotu ba KHUNTO, fo pasaporte falsu. Ita-nia Estadu monu daudauk ona ba tahu laran no rai kuak, tanba ne’e mai hotu, ita salva tiha Estadu ida ne’e” , Xanana dehan.
Xanana hatete, aktu ida husi partidu KHUNTO nian ne’e kontra lei, tanba ne’e instituisaun relevante sira tenke toma atensaun.
“Ita-nia bin sira ne’e no alin feto sira ne’e ho tan ema liu ruanulu, sira sidadaun Indonésia, entrega kartaun eleitoral ba sira. KHUNTO nu’udar partidu entrega kartaun eleitoral ba ema sidadaun Indonésia atu vota ba KHUNTO, ne’e kontra Estadu no kontra lei, ida ne’e mak bolu atensaun ba CNE, la’e ita arbiru de’it ona”, Xanana alerta.
“Ho ida ne’e hotu, dala ruma dehan katak pasaporte laiha ona, dala ruma bele fó pasaporte falsu arbiru de’it, ne’e sà Estadu ida mak hanesan ne’e. Partidu ida entrega kartaun eleitoral ba ema ne’ebé la’ós sidadaun Timor atu aumenta votus”, Xanana lamenta.
Nune’e mós Segundu Vise Prezidente Partidu CNRT, Gíl da Costa ‘Oan Soru’ afirma instituisaun Estadu hothotu no mós ba partidu politiku sira hotu ne’ebé mak eziste iha Timor, labele halo hahalok sira ne’e, tanba timoroan mate liu rihun atus rua, la’ós tanba hahalok porkária hanesan ne’e.
“Foin sae sira loke matan, labele tuir ema sira ne’ebé atu estraga rai ne’e, sira hanoin de’it sira-nia an, basta sira manan hodi hetan benefisiu, tanba ne’e Bobonaru oan sira, lalika fó ona votu ba partidu sira ne’ebé kakutak at hanesan ne’e iha rai ida ne’e”, Oan Soru apela.
Entretantu, hafoin sidadaun na’in-rua ne’e termina deklarasaun iha palku, Prezidente Partidu CNRT, Kay Rala Xanana Gusmão, tara kedan tais ba sira na’in-rua, hanesan sentidu agradesimentu ba sira-nia onestidade.
16,427 total views, 6 views today
Bele hare Video Seluk :
Subscribe to Timorpost
