DILI, (timorpost.com) — Eis Ministru Interiór (MI), Rogério Tiago Lobato, nu’udar Komandante Forsa iha 1975, husu Governu presiza rekoñese eis tropa Portugés tanba sira nu’udar pionéiru ba Forsa Armada Libertasaun Timor-Leste (Falintil).
“Ha’u hatene problema ida-ne’e, ne’e problema ida ke Estadu no Governu ne’ebé oras ne’e ka’er ukun tenke haree, tenke fó rekoñesimentu ba sira, hanesan pionéirus Falintil nian”, Rogerio Tiago Lobato, informa hafoin partisipa iha selebrasaun aniversáriu Proklmasaun Independénsia Unilaterál 28 Novembru ba dala 48 (28 Novembru 1975-2023), iha Palásiu Prezidensiál Nicolau Lobato Bairru Pite, Dili, Tersa, (28/11/2023).
Tamba ne’e nia husu Estadu presiza rekoñese eis tropa Portugés tanba sira nu’udar pionéiru Falintil nian. See timoroan eis militár Portugés ne’e maka la tama FRETILIN hodi ka’er forsa hadau kilat, susar tebes timoroan atu manán independénsia ne’e.
Tanba-ne’e, hanesan Komandante Forsa iha 1975, husu ba orgaun estadu tomak to’o ona tempu atu fó rekoñesimentu ba diréitu eis tropa Portugés ne’ebé harii Falintil no luta ba librtasaun rai ida-ne’e nian.
“Sira hotu ne’ebé uluk hamutuk ho ha’u iha exerzitu Portugés, hadau kilat, arma Fretilin, arma Falintil, sira ne’e to’o ona tempu para estadu atu rekoñese sira-nia diréitu”, Rogério, hatete.
Maske nia ladún lembra ona, maibé iha momentu ne’ebá forsa exerzitu Portugés fila forma Falintil ne’e iha rihun barak, maibé balun sei kontinua ka’er forsa armda agora ne’e sira komesa halo ona identifikasaun.
“Ha’u hatene katak sira barak, rihun barak, prontu sira ne’ebé ka’er forsa ne’e sira mós halo identifikasaun”, nia hakotu. (*)
1,128 total views, 3 views today
Bele hare Video Seluk :
Subscribe to Timorpost
