DILI—Deputadu husi bankada Partidu Libertasaun Popular (PLP), Cornélio Gama L-7 temi hotu rai lulik iha Timor Laran no husu atu lori karau hamutuk-13 hodi hadi’a alias halo tuir hikas meza Prezidente Parlamentu Nasionál nian ne’ebé naksobu iha loron 19/05/2020.
L-7 foti pontu de órden iha sesaun plenária, Tersa (02/06/2020) hafoin deklarasaun polítika husi Bankada CNRT kona-ba situasaun ne’ebé akontese iha momentu ne’eba konsidera asaltu poder husi bankada FRETILIN, PLP ho KHUNTO hodi destitui Prezidente Parlamentu Nasionál sesante Arão Noe hodi hili hikas Aniceto Guterres ba pozisaun dahuluk liu iha órgaun estadu daruak ne’e.
CNRT defende katak meza ne’ebé naksobu deputadu CNRT sira ba asegura maibé tanba hetan atake maka’as husi deputadu sira husi bankada FRETILIN, PLP ho KHUNTO maka meza Prezidente Parlamentu Nasionál nian naksobu.
Maske nune’e, Deputadu L-7 iha nia intervensaun akuja CNRT maka baku fila tiha meza Parlamentu Nasionál. Tanba ne’e, nia husu atu rekoñese sala.
“Uluk ita tau meza iha ne’eba ne’e lulik maka ne’e. Asaun, paixão,” L-7 afirma hodi temi rai lulik sira iha Timor Laran no husu atu hadi’a fali meza ho karau hamutuk-13 inklui karau mutin neen no makerek hitu no lianain sira mak tenke halo tuir.
L-7 dehan, sé la halo tuir ida ne’e maka matebian sira mós sei hader no ema moris sira sei hirus. “Ita tenke konfesa ita nia sala. Ne’e la’ós ita hatun CNRT mas ita tenke hatur fali tanba ami funu, lori buat sira ne’e mak funu to’o remata,” L-7 subliña.
Entretantu iha deklarasaun polítika bankada CNRT nian afirma, deputadu sira CNRT iha Parlamentu Nasionál deside marka hikas prezensa iha plenária hafoin deklara ho nia aliadu sira (UDT/FM ho PUDD) la rekoñese Aniceto Guterres nu’udar prezidente ba órgaun daruak ne’e tanba eleitu husi dalan illegal.
Tanba ne’e, CNRT afirma, ho lideransa Kayrala Xanana Gusmão, hatur metin no defende Estadu Direitu Demokrátiku katak, kualker asaun polítika sira tenke bazeia ba Konstituisaun no Lei odinária sira no CNRT sei hamarik no tuba iha primeira liña hodi la-admite no latolera kualker aktu polítika sira ne’ebé hakarak lejítima koportamentu polítika sira ne’ebé realiza ho forma tácito no expresa hodi viola normas konstitusional. (cao)
710 total views, 3 views today
Bele hare Video Seluk :
Subscribe to Timorpost
