DILI, (timorpost.com)– Vise-Ministru Saúde ba Operasionalizasaun Ospitál, Flávio Brandão Mendes de Araújo, dehan Organizasaun Mundiál Saúde iha Timor-Leste (OMS-TL), iha komitmentu atu hadi’a saúde públika iha rai-laran.
Vise Ministru Saúde segundu ne’e deklara, hafoin simu pakote ai-moruk hamutuk item 121 ne’ebé mak OMS oferese ba Ministériu Saúde liuhosi Institutu Nasionál Farmasia Produtu Médiku (INFPM).
“Agradese tebes ba parsériu OMS-TL ne’ebé iha komitmentu hodi hadi’a saúde públika iha Timor-Leste liuliu atu haree ba moras sarampu ne’ebé mak durante ne’e maioria kontrola ona moras refere”, dehan Vise-Ministru Saúde ba Operasionalizasaun Ospitál, Flávio Brandão Mendes de Araújo, iha edifísiu INFPM, Kampu Alor, Kinta Feira (08/02).
Governante ne’e subliña, nafatin iha responsabilidade boot ida ba OMS atu kontinua fo suporta bainhira iha out break ba moras refere, tanba ai-moruk no ekipamentu médiku ne’ebé mak iha hanesan suporta rutiña ba servisu ka moras espesífiku ne’ebé mak iha maibé mós uza oportunidade ida-ne’e atu uza mós ba servisu rutiña, nune’e mós halo servisu sira ne’ebé mak planeadu ona iha ospitál rejionál sira.
“Ha’u lori governu liuliu Ministériu Saúde nia naran agradese mós ba kolaborasaun sira entre parsériu rua, Ministériu Saúde ho OMS- TL ne’ebé mak durante ne’e la’o ho di’ak tebes no OMS-TL mós senível ho planu no programa sira ne’ebé mak Ministériu Saúde lansa no la’o aliña malu ho suporta sira ne’ebé mak iha,” deklara nia.
Enkuantu pakote ai-moruk médiku ne’e entrega direitamente husi reprezentante OMS- TL, Arvind Mhatur, ba Ministériu Saúde liuhosi Vise-Ministru Saúde ba Operasionalizasaun Ospitál, Flávio Brandão Mendes de Araújo, akompaña husi Diretór ezekutivu INFPM, Brígido Simão Dias de Deus, iha salaun INFPM.(*)
4,587 total views, 3 views today
Bele hare Video Seluk :
Subscribe to Timorpost
