Dili(timorpost.com)— Desteradu Ataúru na’in-lima harii organizasaun ida ho naran, Komité Desteradu Polítiku Ataúru (KDPA) iha loron 01 fulan Dezembru tinan 2019.
Portavós Komité Desteradu Polítiku Ataúru, Jorge Paiva Araújo, dehan liu ona tinan barak nune’e iha loron 01 fulan Dezembru tinan 2019 eis desteradu sira konsege halibur malu fali hodi kria organizasaun ida.
“Eis desteradu polítiku Ataúru, hamutuk nain-lima halibur malu ho objetivu atu harii organizasaun desteradu, nune’e iha loron 08 fulan Dezembru autores eis desteradu Ataúru hamutuk na’in-25, halibur malu hodi estabelese ekipa ida ho naran ekipa konsolidasaun desteradu Ataúru 1980-1987”, dehan Jorge Paiva Araújo, liuhosi konferénsia imprensa ne’ebé realiza iha Salaun CCLN, Komoro, Kinta (15/06).
Nia subliña, iha ne’ebá ekipa refere susesu halo servisu iha fulan rua nia laran no iha loron 23 fulan Fevereiru 2020, autores eis desteradu hosi munisípiu hamutuk hodi transforma ekipa konsolidasaun desteradu Ataúru ba Komisaun instaladora desteradu Ataúru.
Entaun hosi ida ne’e hodi prepara ba primeira konferénsia iha munisípiu sira no prepara ba Kongresu Nasionál iha tempu tuir mai, objetivu prinsipál mak harii organizasaun ida hosi halibur desteradu hotu-hotu.
“Tanba tempu Rezisténsia desteradu iha illa Ataúru no kampu desteradu fatin seluk lokraik dalan ba organizasaun internasionál tama fali mai Timor-Leste no deskobre katak Indonézia halo kontra direitu umanu iha Timor no povu Timor nafatin luta ba ukun rasik-an”, nia esplika.
Nia aumenta, ema sira ne’ebé hamahon-an iha organizasaun ida ne’e hosi autores eis desteradu Ataúru sira rasik ne’ebé mak sei moris no nia jerasaun sira sei iha ne’e.
“Kongresu dahuluk hala’o bazeia ba enkontru Jerál sira no konferénsia Munisipál ba munisípiu hitu no realiza iha fatin hitu, mak hanesan Baukau, Ainaru, Manufahi, Manatutu, Vikeke, Lautem, Dili, Aileu, Likisá no Bobonaru”, Nia deklara.
Kongresu dahuluk ba eis desteradu polítiku Ataúru durante loron tolu, hahú hosi loron 13 to’o loron 15 fulan Outubru tinan 2022, rezultadu Kongresu aprova estatutu Komité Desteradu Polítiku Ataúru (KDPA 1980-1987.
Nune’e iha loron 18 fulan Maiu tinan 2023, ofisialmente organizasaun ne’e legal ona no públika ona iha Jornál Repúblika.
“Ho publikasaun iha Jornál Repúblika ba ezisténsia Komité Desteradu Polítiku Ataúru, mak estrutura nasionál ofisialmente ohin deklara legalmente eziste ona iha Timor-Leste, hanesan organizasaun Rezisténsia sira seluk”, Jorge dehan.
Atu hakotu nia dehan, liuhosi Kongresu Nasionál mós aprova loron 15 fulan Juñu mak sei sai hanesan loron nasionál ba desteradu, tanba ne’e Komité Desteradu hili loron ohin hodi deklara exelénsia KDPA 1980-1987 ba públiku.
1,076 total views, 9 views today
Bele hare Video Seluk :
Subscribe to Timorpost
