DILI (timorpost.com) – Liga ho kazu oho malu no sona malu ne’ebé daudaun buras iha sidade Dili, Sosiedade Sívil konsidera servisu intelijénsia sei fraku.
Diretór Interinu Fundasaun Mahein (FM), Abel Amaral, hatete realidade hatudu kazu oho malu no sona malu buras iha Dili, tanba servisu intelijénsia fraku atu detera krime no konflitu iha fatin-fatin.
“Ita mós ezije servisu intelijénsia sira no servisu informasaun sira tenke servisu makas liu tan, tenke halo vijilánsia iha fatin-fatin, atu nune’e bele alerta molok krime ruma mosu, tanba se servisu informasaun sira ladún másimu, ida ne’e mós difikulta PNTL halo operasaun, tanba informasaun laiha, informasaun dehan hakmatek, maibé ita hakfodak mai, ema mate no kanek no mós tohar ona, ida ne’e hatudu failansu servisu intelijénsia,” dehan Abel Amaral ba Timor Post iha nia knar fatin Bairru Grilhos, Sesta (13/01).
Nune’e mós Fundasaun Mahein husu Governu no Autoridade seguransa atu mellora ka intesivamente halo patroliamantu iha tempu kalan.
“Ami Fundasaun Mahein mós rekomenda ba família no inan-aman no sosiedade no públiku sira hotu tenke kontribui ba pás, atu kontrola oan sira iha tempu kalan, atu nune’e evita krime no konflitus iha ita rai,” nia dehan.
Nia dehan, la’ós konflitu no krime mosu ne’e, tanba PNTL sira laiha osan mak lakohi halo patroliamentu no seguransa iha rai ida ne’e.
“Ita ko’alia kona-ba patroliamentu la ko’alia kona-ba orsamentu, tanba PNTL ne’e nia iha servisu 24 oras, oinsá mak sira bele asegura situasaun rai laran, importante mak ita la bele hein de’it sira seguransa rai laran, maibé ita povu tomak no sidadaun hotu-hotu mós tenke koopera ho instituisaun PNTL, atu nune’e situasaun bele garantidu seguransa ne’e bele atinje,” nia dehan.
Alende Fundasaun Mahein, mós haree situasaun iha rai laran ne’e, sira parte triste, tanba kazu krime konfrontasaun iha tinan kotuk no mai iha fali iha tinan ida ne’e, mosu iha Dili laran rezulta na’in-ida lakon vida no ida hetan kanek grave.
“Ita lamenta no kondena tebes aktu violénsia ne’e, ba fundasaun mahein dezde tina kotuk ita sempre alerta no ezije no rekomenda ba Governu atu intesivamente halo investimentu ba iha setór seguransa, tanba seguransa mais importante, tantu PNTL no mós F-FDTL,” nia hakotu.
1,143 total views, 9 views today
Bele hare Video Seluk :
Subscribe to Timorpost
