Díli (timorpost.com) – Portavós Polisia Sientifika Invetigasaun Kriminál (PSIK), Octávio da Costa Araújo, informa kazu membru Pesoál PSIK ho inisiál MO uza kilat ameasa Sidadaun Seguransa ida iha Terra Santa, iha loro (25/11), ne’e iha ona prosesu investigasaun.
“Relasiona ho ita-nia membru PSIK ho Inisiál MO uza kilat, deskonfia ameasa sidadaun seguransa iha Otél Terra Santa ne’e, iha regra hateten bele lori kilat ba uma, bainhira servisu seidauk remata, maibé la’ós atu lori armas ba iha festa,” hateten Octavio iha knaar Fatin Edifísiu PSIK, Kaikoli, Kuarta (07/12).
Nia dehan, regra koba-ba membru PSIK uza armas ne’e iha, bainhira investigador ida halo servisu atende kazu ruma iha terenu, la’ós uza armas ba uma atu uza ba fali festa, ne’e regra PSIK nian la autoriza.
“Ami-nia membru investigador ida, bainhira oras servisu fila ba uma ita bele uza aramas, tanba ita-nia membru PSIK ho Inisiál MO envolve hela iha grupu ida hodi ezekuta hela mandadu detensaun,” nia esplika.
Nia dehan, iha momentu ne’e membru PSIK MO ne’e, hetan despaxu legál bele lori armas fora de servisu, maibé labele haluha iha tempu ne’e la’ós haruka fali nia atu ba festa lori armas.
“Hafoin akontese kazu ne’e iha terra santa, ita-nia membru PSIK ho Inisiál MO simu ordem halo servisu hamutuk ho grupu ida buka hela autór balun, durante oras 24 nia laran tuir mandadu judisiál Tribunál nian, tanba ne’e iha tempu kalan bele lori armas ba uma, maibé la’ós atu lori ba festa,” nia dehan.
Nia afirma, hafoin akontese kazu ne’e, membru PSIK ne’e tenke hatán ba prosesu, tanba iha kalan ne’e akontese, iha parte dadeer gabinete displinar ho departamentu armamentu seguransa imediata foti kedas armas hodi loke kedas prosesu investigasaun hasoru membru PSIK ho Inisiál MO, agora prosesu sei la’o hela.
“Momentu akontese kazu iha terra santa ne’e, deskonfia ita-nia membru Pesoál PSIK uza aramas ameasa sidadaun Seguransa iha Otél Terra Santa ne’e, ita-nia parte invetigasaun hasai ona nia nu’udar ekipa operasaun hodi submete ba iha prosesu investigasaun,” nia dehan.
Alende ne’e nia dehan, membru Pesoál deskonfia uza armas ameasa sidadaun Seguransa iha terra Santa ne’e, agora tama hela servisu, maibé iha servisu balun limita ona la uza armas atu envolve iha ekipa operasaun atu halo servisu iha terenu, tanba ne’e nia tama servisu hanesan baibain servisu de’it iha edifísiu PSIK nia fatin,” nia hateten.
Alende nia dehan, parte investigadór mós hahú bolu ona vítima balun atu rona sira-nia deklarasaun, hafoin bele halo analiza ba iha membru ne’e nia envolvimentu ba iha kazu ameasa sidadaun Seguransa iha Terra Santa ne’e, iha grau ida ne’ebé, molok foti desizaun prosesu ba iha Ministériu Públiku (MP).
1,800 total views, 3 views today
Bele hare Video Seluk :