Liman Kona Fen, MP Husu Tribunal Kastigu NCS

Timorpost.com I JUSTISA—Ministériu Públiku (MP) liuhusi alegasaun final, solisita ba tribunal atu kastigu arguidu NCS, tanba faktus provadu arguidu halo duni agresaun fízika hasoru lezada DSL.

Ministériu públiku konsidera faktu iha akuzasaun ne’e loos hotu, tanba arguidu rasik konfesa katak nia komete duni krime ida ne’e, tanba ne’e Ministériu Públiku entende katak arguidu nia hahalok ne’e prienxe duni elementu krime ofensa integridade fízika simples.

Tanba ne’e Ministériu públiku husu ba tribunal atu kastigu arguidu tuir hahalok ne’ebé mak nia halo ba lezada hanesan nia fen kaben, tanba iha mane ida hola feto tenke responsabilidade, labele abandona nian fen, tanba iha akuzasaun ne’ebé mak akuza ba arguidu ne’e realidade sira na’in-rua la hela hamutuk ona.

Enkuantu parte defeza la konkorda ho Ministériu Públiku nia alegasaun, atu tau aas teoria no ezijénsia ne’ebé mak iha, tanba ne’e defeza husu ba tribunal atu absolve arguidu.

Entretantu, tuir akuzasaun husi Ministériu Públiku ne’ebé mak juis singular lee sai, katak, lezada DSL iha relasaun ho arguidu hanesan fen ho la’en dezde tinan 2011 no sira seidauk iha oan.

Iha loron 23 de Fevereiru 2022, iha oras 12h00 meiudia, iha Bekora-Dili, momentu ne’ebá arguidu uza liman hodi tuku dala ida ho maka’as iha lezada nia kabas rezulta moras.

Motivu husi problema ne’e tanba arguidu lakohi atende telefone husi lezada, nune’e lezada mós ba buka tuir arguidu iha nia bin nia uma, atu fila mai uma. Depois de problema ne’e arguidu mós halai sai tiha husi uma, to’o agora la fila.

Konsekuénsia husi arguidu nia hahalok ne’e maka halo lezada sente moras iha kabas tanba hetan tuku husi arguidu.

Arguidu halo ho forma livre, deliberada no konxiente, hatene momoos (ben sabendo) katak uza liman hodi tuku, bele halo moras, maibé arguidu halo nafatin nia hahalok ne’e hanesan meius ou instrumentu ida ne’ebé mak apto no adekuadu hasouru lezada.

Arguidu mós hatene hela katak, nia hahalok sira ne’e proibidu tuir lei penal, tanba ne’e, arguidu NCS hanesan autoria material ba pratika krime ofensa ba integridade fízika simples ne’ebé previstu iha artigu 145 no. 1 CP, ho referénsia ba lei non 7/2010, haktuir ba artigu 2,3, no 35, ba Krime Violénsia Doméstika hasouru lezada.

Hatán akuzasaun ne’e, arguidu NCS konfesa katak faktus ne’ebé sita iha akuzasaun balun loos no balun sala. Iha altura ne’ebá lezada moras, entaun mai tiha nia família la kontaktu arguidu, tanba ne’e arguidu mós la preokupa hodi buka lezada, iha altura ne’ebá nia hatene lezada moras.

“Maibé agora iha ona, tribunal oin ha’u deside fahe malu ho lezada, ha’u lakohi fila ba lezada ona hanesan fen”, arguidu konfesa ba tribunal iha sala julgamentu, Kinta (04/05).

Enkuantu lezada DSL konfesa katak, iha altura ne’ebá nia telefone ba arguidu, maibé arguidu la simu telefone no lezada kontinua nafatin telefone, maibé arguidu nia bin hanesan lezada nia kuñada mak foti fali telefone, tanba ne’e lezada husu ba arguidu nia bin, arguidu iha ne’ebé, arguidu hatán dehan toba.

“Loron tuir mai tan ha’u telefone ba arguidu nia bin mak kontinua simu, hodi dehan arguidu ami haruka nia hein labarik, arguidu nia maun ho bin ba servisu, tanba ne’e ha’u hanesan nia fen kaben ha’u sente laran moras, tanba saida mak sira haruka hein labarik, nusa nia la buka servisu hodi sustenta ami rua nia moris,” lezada dehan

Nia hatete, iha altura ne’ebá, lezada ba hasoru arguidu iha uma Taibe, mosu diskusaun entre arguidu ho lezada, entaun lezada nervozu hodi basa arguidu nia hasan, nune’e mós arguidu mós nervozu hodi tuku dala ida iha lezada nia kabas.

Maski arguidu halo hanesan ne’e, maibé lezadu kontinua perdua nian, haruka nia buka servisu, maibé arguidu lakohi fó oin ba nia, tanba ne’e mak nia hato’o keixa ba iha parte polisia, atu kontinua na’in-rua hola malu.

Maibé to’o ona tribunal mak arguidu lakohi, nia mós simu realidade ida ne’e, hanesan ema umana, maibé nia parte lakohi atu separa ho arguidu.

Rona tiha depoimentu husi parte rua nian, juiz singular deside adia hikas prosesu julgamentu ne’e ba loron 01 fulan Juñu tinan 2023, hodi rona desizaun ikus.

Audiénsia julgamentu preside husi singular, Arjentino nune’e, Ministériu Públiku reprezenta husi prokuradór Hernâni Rangel da Cruz, no arguidu hetan asisténsia legal husi advogadu Lino Lopes.