DILI (TimorPost.Com) — Governu Konstitusionál dasia (IX) falla rezolve problema povu durante loron 120 nia-laran ne’ebé promete ona husi Primeiru Ministru, Kay Rala Xanana Gusmão, tanba kuaze membru Governu sira la kumpri orientasaun Xefe Governu nian.
Problema no preokupasaun povu nian durante ne’e mak kona-ba pasaporte, folin foos no nesesidade seluk tan maibé to’o agora nafatin sai preokupasaun ba povu.
“Ha’u haree kuaze membru governu la kumpri desizaun Primeiru Ministru iha tempu tomada depose IX Governu fó sai iha Palasiu Prezidente, ne’ebé husu governante sira atu rezolve problema prioridade sira hanesan pasaporte no hatún folin nesesidade báziku iha loron 120 ne’e falla hotu, tanba to’o agora povu nafatin halerik”, Diretór Ezekutivu Fundasaun Hadomi Timor (FHT), Abrão Nico Monteiro, informa ba Timor Post iha nia kna’ar fatin, Faról, Kinta,09/11/2023.
Nia hatutan, problema sosiál ne’ebé povu enfrenta, tuir loloos governante relevante tenke toma responsabilidade esklarese ba públiku oinsá buka solusaun ba problema sira ne’e, tanba Xefe Governu delega ona kompeténsia ba governante ida-idak liuhosi orgánika ministériu nian atu buka solusaun imediata durante loron 120 nia-laran maibé realidade governante sira ladún iha vontade halo serisu.
“Ha’u hanoin Xefe Governu, natón iha tomada de pose IX Governu fó sai iha diskursu, ne’ebé ita hotu hatene fó prioridade ba pasaporte no hatún folin nesesidade báziku, membru governu tutela sira durante ne’e ladún sériu atu servisu hodi buka solusaun iha loron 120, sira la kumpri desizaun ne’ebé Primeiru Ministru fó sai iha momentu ne’ebá”, Abrão hatete.
Nune’e, Governu da-IX ultra passa ona ukun 120, husi dia 1 Jullu to’o mai dia 3 Novembru 2023 kompleta ona mós seidauk iha informasaun klareza ida kona-ba problema pasaporte no povu kontinua halerik ba folin foos.
“Ha’u haree loron 120 ne’e ninia efeitu laiha, tanba ita haree preokupasaun barak mai husi povu laiha asesu ba pasaporte, to’o agora povu barak sei kontinua halerik ba folin foos ho nesesidade báziku sira seluk, ne’e hatudu katak sira ladún servisu”, Diretór FHT Abrão krítika.
Nune’e FHT nu’udar organizasaun sosiedade sivil, nafatin husu ba Primeiru Ministru, Kay Rala Xanana Gusmão atu kontrola didi’ak governante sira para hala’o kna’ar ho sériu hodi rezolve problema ne’ebé povu infrenta.
Aliende problema pasaporte no nesesidade báziku, Governu mós tenke iha orientasaun kona-ba investimentu iha rai-laran para bele loke kampu traballu.
“Saida maka akontese, mosu problema balu entre joven sira iha munisípiu balu, ha’u hanoin ida-ne’e ita labele fó sala de’it ba joven, mais oinsá maka governu buka solusaun, identifika didi’ak problema ne’e, servisu laiha, i presiza halo investimentu para loke kampu servisu ba joven sira”,nia esplika.
Nia hatete, tinan 20 resin ona ukun-an, ukun na’in troka malu maibé povu durante tinan barak nafatin sai atan ba ukun na’in sira ne’e, depois to’o tempu eleisaun tuun halo kompromísiu oioin mais to’o ukun tiha benefisiu ba povu laiha nafatin konserteza problema ne’e mosu.(*)
924 total views, 3 views today
Bele hare Video Seluk :
Subscribe to Timorpost
