DILI (timorpost.com)—mate isin Gracildo Soares da Silva no Florindo de Araújo, to’o ona Dili, liuhusi Aeroportu Internasionál Nicolau Lobato Komoro Dili, Domingo (13/08/2023) maizumenus hale’u tuku 06:30,
Iha aeroportu Comoro, mate isin simu direta husi Sekretáriu Estadu Formasaun Profesionál no Empregu (SEFOPE), Rogério Araújo Mendonça, no entrega ba família matebian na’in rua.
Matebian na’in-rua ne’e, hakotu iis iha Korea do Súl, hafoin hetan asidente tráfegu. Matebian Gracildo Soares da Silva hosi munisípiu Dili no Florindo de Araújo husi munisípiu Ainaru.
SEKFOPE, Rogério Araújo Mendonça, sente triste, tanba Timor-Leste lakon tan joven potensiál na’in-rua, ne’ebé durante ne’e luta ba moris iha Korea do Súl, tanba de’it nesesidade ekonomia família.
“Lori Nonu Governu liuhosi SEFOPE, hato’o sentidu kondolénsia ba família Gracildo ho Florindo. Ami triste tebes, tanba joven na’in rua husik hela ita. Sira sai liña daruak ba libertasaun povu ida ne’e, liberta ekonomia família no mós nasaun laran”, tenik SEFOPE Rogério Araújo Mendonça.
Entretantu, família simu matebian na’in rua simu ho tristeza no agradese ba Nonu Governu atraveza hosi SEFOPE, tanba esforsu lori ona matebian to’o Timor-Leste.
2,736 total views, 9 views today
Bele hare Video Seluk :
Subscribe to Timorpost
