RAEOA (timorpost.com) – Traballadór hosi Kompaña Pax, Transforma Sidade Rejiaun Administrativu Eespesiál Oe-Kusi Ambenu (RAEOA), sai sidade ne’ebé nabilan ho ambiente furak no moos.
“Ami kontente tebes ba servisu Cleaner Pax ida ne’e, durante fó ami servisu hodi hadomi ita-nia rai Oe-Kusi atu sai sidade di’ak no livre hosi lixu,” Koordenadór Cleaner PAX, Henrique de Carvalho Taimenas, hateten ba Timor Post, iha Santa Rosa, Domingu (05/02).
Nia dehan, sira nu’udar cleaner Pax iha RAEOA, prontu atu halo nabilan sidade Oe-Kusse hodi livre hosi foer no hases sidadaun sira hosi moras.
Tanba ne’e nia sujere, atu Governu bele troka malu maibé servisu PAX tenke lao nafatin hodi fó garantia ba povu no nasaun livre hosi lixu.
“Durante ami hala’o servisu, ami sente katak buat ida ne’ebé fó ezemplu ba ami katak biar ami balu beik, maibé garante ambiente moos no ijiene ba ema hotu”, nia hateten.
Tan ne’e, nia hato’o ba Prezidente Autoridade RAEOA, atu bele kontinua servisu Pax iha Oe-kusse.
Enkuantu nia aprezenta ba Fulan ida sira hetan saláriu 115 USD, maski sira sente lato’o ba nesidade no oan sira-nia Eskola, maibé la hamate sira vontade servisu hodi halo tuir buat ne’ebé Governu hakarak.
Nune’e tuir nia Observasaun ba ambiente iha RAEOA ne’e daudun sira haree estudante no Komunidade balun hanorin buat di’ak no balun seidauk komprende loloos saida maka sira atu hadi’a ambiente iha Rai Oe-Kusi.
Nia konta sira komesa hahú servisu iha oras tuku 6:00 dadersan to’o tuku 12:00 oras, deskansa depois tuku 1:00 Otl maka kontinua ba to’o tuku 5:00 loraik. Ne’ebé sira-nia ekipa Pax servisu hahú husi Dirasaun Sakato, Ponte Noefefan to’o Tono.
“Ikus liu ha’u-nia mensajen ba Estudante, Inan-Aman, Komunidade no ema ne’ebé mai hala’o vizita iha Oe-Kusi, katak ita-nia sidade ida ne’e, labele so’e fo’er no labele tafui mama been arbiru no tau matan ba buat ne’ebé ita halo ona”, nia hakotu.
1,697 total views, 3 views today
Bele hare Video Seluk :
Subscribe to Timorpost
