DILI, (timorpost.com)— Sekretáriu Ensiñu Tékniku Vokasionál iha planu ba tinan 5, fó prioridade hodi hadi’ak kualidade ensiñuu iha nível tékniku vokasionál, tanba ne’e Diresaun Ensiñu Sekundária sei haree fila-fali akordu ne’ebé Ministériu Edukasaun estabelese ona ho Indonézia hodi nune’e bele aumenta kursu foun iha área Kafé.
“Ami tenta estabelese komunikasaun ho adidu edukasaun Indonézia nian iha Timor-Leste, oinsá haree fila-fali ba akordu ne’ebé uluk asina ona atu ajusta programa balun, liuliu iha ensiñu tékniku vokasionál, planu ne’e oinsá atu aumenta kursu foun ha ensiñu tékniku vokasionál kona-ba Kafé nian”, Sekretáriu Estadu Ensiñu Sekundáriu (SEES), Deolindo da Cruz, informa, ba jornalista sira iha salaun VIP, Ministériu Edukasaun, Villa-Verde, Segunda, (25/03).
Nia hatete, sira mós sei halo akordu ida hodi eleva kualidade ensiñu ida ne’ebé foka ba estudu kona-ba peska, tamba jeografikamente tasi Timor ne’e luan no iha ikan ho produtu tasi barak maibé durante ne’e estudu kona-ba área peska nian sei menus, nune’e ba oin ME sei halo akordu ho ME Indonézia iha área ida-ne’e.
Aleinde ne’e ME mós sei haree oinsá formasaun ka kapasitasaun ba profesór sira, liuliu iha sentru formasaun ne’ebé lokaliza iha Jawa Leste, Malang Indonézia, P3GT(Pusat Pelatihan dan Penataran Guru Téknik) ne’ebé koñesidu ona, iha futuru ME sei halo akordu ho ME Indonézia, oinsá atu bele fasilita formasaun ba manorin sira iha área tékniku vokasionál.
“Programa ne’ebé sira diskute ona ne’e foka ba área tolu mak hanesan, aumenta kursu kona-ba Kafé, ida maka estudu kona-ba peska, maske daudauk ne’e Timor-Leste iha ensiñu peska ida iha Ataúro no ida iha Atabae maibé seidauk iha rekursu ne’ebé adekuadu atu dezenvolve área peska no programa ida seluk mak kapasitasaun ba manorin tékniku vokasionál”, nia hatete.
Enkuantu husi diskusaun ne’ebé parte rua halo ona, ida mak atu hasa’e kualidade edukasaun iha Timor-Leste, Timor-Leste no Indoenézia servisu hamutuk atu fasilita sentru formasaun profesór nian ida iha Malang-Indonézia ne’ebé foka liu ba área téknika, tamba Timor-Leste daudauk ne’e esforsu hela ba kualidade edukasaun, ne’eduni sentru formasaun ne’e hanesan sentru ida ne’ebé kompetente iha área refere.
Nia haktuir, iha mós sentru formasaun ida iha Malang ne’ebé kapasita kona-ba hadi’ak telefone samsung, profesór tékniku sira iha Indonézia aprende iha ne’ebá, tamba ne’e, adidu husi Indonézia sujere atu Timor-Leste mós bele aprende iha ne’ebá, liuliu iha área estudu kona-ba kafetaria no peska, tamba daudauk ne’e Indonézia iha fundu ba ida-ne’e, nune’e sira sujere atu ME bele hato’o proposta ne’ebé sira propoin hela atividade ba tinan 2025 nian.(*)
2,355 total views, 3 views today
Bele hare Video Seluk :
Subscribe to Timorpost
