DILI (Timor Post)—Pro-Reitór Asuntu Akadémiku Universidade Oriental (UNITAL), Zulmiro Pinto, hatete sira submete ona lista estudante hamutuk 8.274 ba Ministériu Ensinu Superior, Siénsia no Kultura (MESSK), atu assesu izensaun propinas husi governu.
“Iha loron 25 fulan Agostu ne’e ekipa auditoria husi ensinu superior mai iha UNITAL orienta hahú prosesa daudaun ona, kona-ba kuantidade seidauk fisku tanba foin mak hahú prosesa iha horibainrua, maibé ohin governu aplika konfinamentu obrigatóriu ne’ebé agora paradu hela”, nia informa ba Timor Post iha kampus UNITAL, Sesta (27/08).
Nia dehan, estudante iha UNITAL hahú prosesa daudaun ona izensaun propinas estudante ne’ebé apoiu husi MESSK tuir duni estandarte universidade nian ba ano letivu tama nian tanba propinas lahanesan balun selu kada semester $30.00, balun $35.00, balun $90.00 so fakuldade saúde mak propinas $200, maibé Ministériu Ensinu Superior apoiu ho estandarte $150, sei propinas liu ida ne’e estudante tenke aumenta rasik, maibé ida ne’e hakmaan ona estudante sira nia susar terus iha situasaun difisil nia laran.
Tanba ne’e nia nafatin alerta ba estudante sira katak horisehik foin loron rua hanesan halo atendimentu ba estudante lubuk ida, maibé ohin labele halo tanba situasaun konfinamentu obrigatóriu to’o loron 2 fulan Setembru, husi governu kona-ba servisu seluk ami halo, maibé halibur ema barak maka labele.
Nia aprezenta, tuir tarjetu husi MESSK, katak prosesu izensaun propinas sei finaliza iha 30 fulan Outubru, maibé dala-ruma sei iha posibilidade fulan rua (2), maibé tenke haree mós situasaun tau to’o dia 30 Outubru, situasaun kontinua konfinamentu obrigatóriu labele halo buat ida.
Nia esplika, Fiar katak MESSK sei adia tan data ne’ebé sira fó sai, maibé sei avizu ba estudante sira atu mai prosesa sira nia dokumentu horisehik akompaña dosente sira fahe hotu ba fatin 5 hanesan atu atende estudante sira.
Estudante sira ne’ebé sei iha foho alerta fatin ba sira, maibé universidade sei buka meius oinsá atu manda sira-nia dokumentu sira tuir kolega sira hodi prosesa sira, maibé nafatin sei hein sira tanba difikuldade mak transporte atu viajen mai difikuldade sira ne’e universidade tetu mós la di’ak. Maibé universidade nafatin iha estratéjia ba estudante sira mai prienxe formuláriu depois atendementu halo cross check lista husi universidade submete ba MESSK.
Ikus liu, nia dehan, orgullu ba governu maski situasaun difisil Covid-19, maibé rona nafatin estudante sira-nia halerik susar terus iha situasaun difisil hodi hakmaan sira, iha pandémia ida ne’e mós fó impaktu ba atividade ekonomia, edukasaun, agrikultór buat hotu-hotu paradu iha parte pozitivu no parte negativu aprende buat barak, oinsá atu kuidadu saúde. (mj7)
1,120 total views, 3 views today
Bele hare Video Seluk :