Dili (timorpost.com) – Governu liuhosi Ministériu Administrasaun Estatál (MAE), servisu hamutuk ho Institutu Nasionál Kombate Hiv-Sida (INKSIDA), halo workshop ba Autoridade Munisípiu sira kona-ba asaun prevensaun moras HIV-SIDA, ho tema “Papél Autoridade lokál ba prevensaun moras HIV-SIDA iha Timor Leste”.
Vise Ministru Administrasaun Estatál, Lino de Jesus Torrezão, hatete workshop ne’e ho objetivu atu identifika no fó solusaun ba hahalok risku ne’ebé fó impaktu ba tranzmisaun HIV-Sida.
“Ha’u atu hato’o de’it katak iha fatin ida ne’e ita marka prezensa iha fatin ida ne’e hodi hahú halo ita-nia workshop ida ne’e atu habelar moras HIV-SIDA ba iha ita-nia Komunidade sira-nia leet liuliu ba Na’i xefe suku sira tanba sira maka besik liubá Komunidade sira”, nia hateten hafoin workshop iha Salaun Luz Claritas, Formosa, Kuarta (14/09).
Nia dehan, moras ida ne’e la’ós ba de’it otas nurak sira maibé ba iha parte ema ne’ebé otas boot no mós iha osan, tanba sira atu hetan moras HIV-Sida ne’e namkari iha Territóriu tomak.
Nia informa, workshop ne’e sei halo iha Territóriu tomak dahuluk sira halo iha ne’e, ne’ebé la’ós para iha ne’e maibé sei kontinua iha Munisípiu sira hotu atu bele halo sosializasaun hodi bele iha koñesimentu kona-ba moras HIV-Sida.
“Ministériu Administrasaun Estatál nia hanesan responsavel boot, tanba estrativamente ba Na’i Xefe Suku sira, iha MAE nian. Ho ida ne’e maka ohin simu konvite hodi mai loke Workshop ida ne’e atu hato’o netik liafuan balun ba sira no komponente tomak hodi bele hatene no iha koñesimentu kona-ba moras HIV-Sida”, nia hateten.
Nia hatutan, INKSIDA hanesan Institutu Públiku, ne’ebé realizasaun sira hanesan ne’e konta nafatin Ministériu Administrasaun Estatál nia apoiu.
“Ohin realiza workshop ida ne’e hahú iha Dili, mai fali aproxima ita bele realiza iha Munisípiu hotu”, nia hakotu.
Iha Fatin hanesan Prezidente Institutu Nasionál Kombate HIV-SIDA IP, Atanásio de Jesus, hatete objetivu husi eventu ne’e atu autoridade lokál no lider komunitáriu sira diskute ko’alia kona-ba moras HIV-SIDA ne’ebé agora da’et maka’as iha Timor-leste inklui maka’as iha munisípiu Díli, ezisténsia ema estranjeira ne’ebé tama mai Timor-Leste no halo atividade ilegál tama iha atividade prostituisaun dala-barak emigrasaun check de’it dokumentu maibé la check ema nia kondisaun durante ne’e vistu turista maibé to’o fatin refere halo fali atividade seluk iha otél.
“Tanba ne’e objetivu konvida Lider Komunitáriu sira mai hodi kontrola no tau matan ba sosiedade sira-nia hela fatin, tanba dala-barak ema halo relasaun sexual livre ne’e lalika dun ba ema Estranjeira, maibé iha lokál mós akontese, informa ba saúde halo prevensaun moras HIV-SIDA no ita halo ona ajustamentu ba otél balun iha ne’ebá kuaze idade joven ba vizita otél”, nia hateten.
Tanba ne’e nia husu ba ministériu sira tenke halo kometimentu envolvimentu ba joven sira inklui kometimentu relasaun ransu livre ne’e primeiru edukasaun família ne’e importante.
2,421 total views, 3 views today
Bele hare Video Seluk :