DILI (timorpost.com) – Organizasaun Noun Governmental (ONG) Frontline Timor-Leste hamutuk ho Ministériu Saúde (MS) no Autoridade Munisípiu Ermera lansa ona kampaña saúde iha loron 04 fulan Setembru to’o 13 Outubru 2023.
Informasaun ne’e Timor Post asesu hosi media Frontline Timor-Leste katak, hodi hanoin hikas iha loron mundiál ba mortalidade inan no oan, ne’ebé sei akontese iha loron 15 Outubru, ekipa Frontline Timor-Leste hamutuk ho Ministériu Saúde no Autoridade Munisípiu Ermera lansa ona kampaña Saúde iha ohin loron no sei remata iha loron 13 Outubru.
Eventu ida ne’e hahú ho serimónia abertura konsulta espesializada iha Sede Suku Fatubolu, iha postu administrativu Hatulia B, ne’ebé hola parte husi sentru saúde internamentu Guisarudo.
Iha serimónia abertura ne’e, komunidade husi suku Fatubolu, ne’ebé kompostu husi aldeia haat, partisipa ativamente.
Iha konsulta espesializada sira ne’ebé oferese, atividade sira hanesan konsulta jerál, atendimentu ba inan-isin rua, planeamentu familiár, vasinasaun labarik, kuidadu kontinua ba saúde, ekografia, teste laboratóriu no servisu farmásia.
Iha serimónia abertura konsulta espesializada, hetan partisipasaun husi administradór postu Hatulia B, Adrien Ximenes, Diretór Nasionál apoiu kuidadu primária no família, Noel Soares, Xefe Saúde Maternal no Infantíl, Augusta Lopes no reprezentante sira husi Servisu Saúde Munisípiu Ermera.
573 total views, 12 views today
