Dili (timorpost.com)—Prezidente Repúblika (PR), Jose Ramos Horta deklara iha tempu badak sei partisipa Reuniaun Asembleia Jerál iha Nova York.
Prezidente Horta iha plenária sei ko’alia kona ba aprosimasaun integradu hodi elimina moras sira, hanesan sarampu, moras tranzmisaun liu husi seksuál sira HIV-SIDA nune’e mós moras sira seluk ne’ebé foku mós hanesan inan ho oan nian, prevensaun ba inan isin rua no labarik.
“Fiksu katak Prezidente Republika sei ba partisipa Asembleia Jerál Nasoins Unidas nian ba sesaun 77 iha Nova Yorke”. Haktuir Reprezentante Organizasaun Mundial Saude (OMS) iha Timor-Leste, Arvind Mathur hafoin hasoru malu ho Prezidente Repúblika Jose Ramos Horta iha Palasiu Prezidensiál Ai tarak-Laran, Kuarta (06/09/2023).
Nia haktuir, Iha asembleia jerál ne’e sei iha eventu saúde haat ne’ebé importante tebe-tebes.
Dahuluk sei ko’alia kona-ba Covid-19, daruak sei ko’alia kona-ba kobertura saúde universál, datoluk sei ko’alia kona-ba kombate tuberkuloze, no dahaat nian sei ko’alia mós kona-ba lideransa no mós esforsu nasaun sira nian ba iha eliminasaun ba moras sira ne’ebé bele prevene iha Timor Leste.
Partisipasaun Timor-Leste iha Reuniaun Asembleia Jerál iha Nova York sai hanesan papél importante tebes tanba durante ne’e Timor Leste hatudu ona atinjimentu di’ak tebes hodi halo eliminasaun ba moras balun.
Iha eventu ne’eba mós sei partisipa husi Ministru Saúde sira husi nasaun barak inklui mós Timor Leste, iha ne’eba sei ko’alia kona-ba servisu ba iha eliminasaun moras sira.
Timor Leste ofisialmente elimina ona moras rubella, agora daudaun hamutuk ho lideransa sira, esforsu hela prosesu atu halakon mós sarampu, inklui moras sira seluk hanesan tetanus neonatal.
“Ha’u hakarak fó obrigadu ba kolega média sira, tanba ita bo’ot sira iha papél ne’ebé importante tebe-tebes hodi fahe mensajen importante sira hanesan ne’e ba ita nia komunidade sira mensajen kona-ba saudavel, no ami prontu nafatin atu servisu hamutuk ho média sira iha asuntu saúde nian hodi halo promosaun ba saúde no mós promove estilu moras ne’ebé saudavel ba ema hotu iha Timor Leste”. Hakotu.
1,689 total views, 3 views today
Bele hare Video Seluk :
Subscribe to Timorpost
