DILI(TimorPost)–Durante fulan Marsu to’o Abríl tinan ida ne’e, Hospital Nasionál Guido Valadares (HNGV), rejista pasiente fase raan hamutuk 99 no iha pasiente na’in 5 maka mate.
“Pasiente ne’ebé durante ativu fase raan iha fulan Marsu hamutuk 95, iha fulan Abríl ita iha tan pasiente foun na’in-haat, entaun total hamutuk 99 mak ativu hela atu fase raan”, dehan Espesialista Neofrolojia iha Hospital Nasionál Guido Valadares (HNGV), Gustavo do Rosario da Cruz, iha ninia servisu fatin HNGV, Tersa (16/05).
Nia hatete, Iha fulan Abríl pasiente na’in-lima mak lakon vida, husi pasiente hirak ne’e iha balun foun no balun halo tratamentu kleur ona, pasiente sira ne’e mate tanba hetan infesaun ho kondisaun grave ona. Pasiente hirak ne’ebé lakon vida ne’e maioria ho idade 30 no 40 ba leten.
Pasiente ne’ebé lakon vida tanba sira nia katetér la funsiona, balun la kontrola sira nia hahan han, balun la kontinua fase raan, entaun bainhira sira grave ona maka foin mai halo tratamentu ikus mai médiku labele salva sira nia vida.
“Ita nia atendimentu hahú ita tenke prepara asses katak asesu temporáriu ne’ebé ita uza mangeira tau iha kakorok Ofélia depende sira nia asesu, ita bele dehan ne’e mak hasoru problema”, nia hatete.
Entretantu dadus hosi janeiru to’o dezembru 2022 rejista pasiente fase-raan hamutuk 47, hosi númeru ne’e na’in-19 mak lakon vida. Iha Iha fulan janeiru 2023 unidade neofrolojia rejista pasiente na’in-13, husi númeru ne’e na’in rua mak lakon vida tanba moras komplikasaun
Fase raan nia kauza iha buat lima mak hanesan raan midar, tensaun, rins, polikistiku, obsturksaun, no mós moras primaria sira, moras hirak ne’e mak predomina lori pasiente ne’e to’o hetan rins avansadu.
1,068 total views, 6 views today
