Baukau(timorpost)—Prezensa Ilas São João Bosco iha eskola sira liuliu eskola Sekundária Jerál 01 Baukau ho objetivu oinsá Inspira no lori foin sa’e sira hakbesik-an ba Na’i Jesus Kristu no Aman Maromak.
“Prezensa Ilas Dom Bosco nian iha eskola sira liuliu Eskola Sekundária Jerál 01 Baukau ne’e hodi inspira foin sa’e no estudante sira oinsá hakbesik-an ba Na’i Jesus Kristu, tanba Dom Bosco nu’udar aman ka mestre ba foin sa’e sira hotu”, Padre Aderito Euclides da Costa SDB, informa ba Timor Post, hafoin remata misa Enseramentu Vizita Ilas Dom Bosco iha ESJ 01 Vila-Nova, Tersa (30/1).
Amu esplika, vizita Ilas São João Bosco, hanesan oportunidade furak tebes ba joven no estudante sira, tanba ne’e sai ona tradisaun ida ne’ebé mak hahú ona iha tinan 2021, tanba iha momentu ne’ebá Edukasaun Munisípiu foti Ilas Dom Bosco sai hanesan Mahein ba Edukasaun.
“Tradisaun ida ne’e ami hahú iha tinan 2021, Diretór Servisu Edukasaun Munisípiu Baukau husu ami atu deklara Dom Bosco hanesan Mahein, Sai Aman no Mestre ba edukasaun”, Ami Aderito hateten.
Iha Fatin hanesan Diretór ESJ 01, José Clementino, hatete ho prezensa Ilas Dom Bosco iha eskola refere hanesan grasa boot ida hodi halibur, hadi’a no haforsa liu tan profesores no estudante sira, tanba durante ne’e ESJ 01 Baukau nakonu ho problema.
“Prezensa Ilas Dom Bosco mai iha ami nia eskola bele halo milagre ruma iha ami nia eskola ne’e, tanba ami nia eskola ne’e nakonu ho problema durante ne’e, maibé ho prezensa aman ka mestre nian ne’e bele muda ona estudante sira nia mentalidade ba dalan ne’ebé di’ak”, profesór ne’e haktuir.
Entretantu reprezentante estudsnte ESJ 01 Baukau, Cristiano da Silva Gama, hatete, sente haksolok no fó agradese ba Amu Parókia St. António Baukau Vila-Antiga hodi lori Ilas Dom Bosco vizita eskola refere hodi kria pás no estabilidade iha eskola ne’ebá.
2,073 total views, 3 views today
Bele hare Video Seluk :
Subscribe to Timorpost
