Jornalista Caetano Guterres / Editór Noémio Falcão
BAUKAU (Timor Post)—Defeza husi arguidu oknum ajente Polísia Nasionál Timor Leste (PTL) ho inisiál FCS ne’ebé tiru joven na’in-rua iha suku Samalari, Postu Administrativu Baukau Villa, Munisípiu Baukau, la simu desizaun tribunál aplika krime omesídiu simples ba nia kliente tuir kódigu penal artigu 138.
Defeza arguidu nu’udar Defesor Publiku subliña, nia kliente kumpri órden servisu iha akotesimentu ne’e defende-an no komunidade sira.
Ho rajaun ne’e, defeza deside halo rekursu durante loron 15 hasoru desizaun Tribunál Distrital Baukau, tanba tuir loos aplika artigu 140 kódigu penal kona-ba omesidu neglizénsia ka falta kuidadu.
“Momentu ne’e nia halo (tiru) tanba haree situasaun ne’e nia tenke asegura nia-an asegura mos komunidade. Prontu, deskuidu.” Defeza José Grigório de Lima ba Timor Post, Sesta (5/11/2021) iha Tribunal Distrital Baukau.
Motivu hosi akontesementu ne’e bainhira komunidade vizita rate iha loron 1 depois mosu konfrontu entre grupu joven ataka mulu hafoin komunidade husu ajuda ba arguidu hodi halo atuasaun ba konfrotasaun ne’e ho tiru teu dala rua.
Maibé tanba grupu hirak ne’e kontinua ataka malu hodi aperta nia ikus mai arguidu tiru bala da-haat iha alkatraun hodi kona vítima DSMS nia ain hetan kanek todan, maibé grupu hirak ne’e kontinua ataka arguidu husi kotuk maka arguidu tiru bala dalima ho intensaun atu tiru aliza vítima maibé deskuidu hodi hakotu vítima inisiál MC nia vida iha kedas fatin akontesimentu.
Iha julgamentu ne’e Ministériu Publiku akuza arguidu FCS ho pena prizaun tinan-8 to’o tinan-20 tuir kódigu penal Timor Leste artigu 138.
Julgamentu ne’e prezide hosi Presidente Juis Florencia Freitas, Ministériu Publiku reprezenta hosi Bartolomeo Araújo no arguidu hetan defeza hosi defensor publiku José Gregorio de Lima.
Tuir observasaun jornalista nian nota katak arguidu FCS hatais kalsa badak faru liman badak, uza hena hanesan máskara taka ibun no borgol iha liman hafoin sa’e karreta polísia nian hodi ba sela prizaun.
820 total views, 3 views today
Bele hare Video Seluk :