Dili(timorpost.com)—Ministru Koordenadór ba Asuntu Ekonomia (MKAE), Joaquim Amaral, hamutuk ho Embaixadór Uniaun Europeia iha Timor Leste, Marc Fiedrich, halo lansamentu ba projetu Rai Matak no mós komemora loron mundiál ambiente liuhosi atividade kuda ai oan, iha suku Triloka, postu administrativu Baukau Vila, munisípiu Baukau, Tersa (06/06/2023).
Lansamentu ba projetu Rai Matak no mós komemora loron mundiál ambiente liuhosi atividade kuda ai oan, ne’e akompaña hosi Xefe Gabinete MKAE, Sebastião C.R.S. Simões, Asesór Ekonomia, Feliciano da Costa.
Objetivu hosi lansamentu projetu Rai Matak ne’e programa foun ida ne’ebé implementa liuhosi parseiru entre fundasaun Ho Musan Ida (HMI), Fundasaun Xpand, Oxfam Timor-Leste no organizasaun lokál sira.
Programa ne’e mosu, hafoin Fundasaun no Musan Ida (HMI) no Fundasaun Xpand hetan ho programa dahuluk Gold Standard iha Timor Leste ne’ebé verifika ho Carbon Armazena iha floresta sira liuhosi kuda ai hodi hamosu fali floresta karbon armazena ho komunidade agrikultór substánsia sira.
Tanba programa ne’e kontribui haburas ekonomia lokál no eduka komunidade liuhosi formasaun pratika iha area agro-floresta no re-floresta ba sustentavel no justu liu.
Relasiona ho asuntu ne’e, Timor Verde nu’udar terseira parte implementadór iha projetu Rai Matak, ne’ebé finansia hosi Uniaun Europeia hodi habelar liután informasaun ba komunidade sira, liuhosi lansamentu projetu Rai Matak ho atividade kuda ai oan hodi komemora loron mundiál ambiente nian.
Partisipa iha lansamentu ne’e reprezentante Sekretáriu Estadu Ambiente (SEA), Reprezentante Oxfam iha Timor-Leste, Xpand, Diretór Rai Matak, Sahe da Silva, Reprezentante Autoridade Munisípiu Baukau, Komandante F-FDTL Baukau, Komandante PNTL Munisípiu Baukau, Autoridade Lokál, Estudante Estaziadu UNTL no komunidade Baukau.
Notísia ne’e Timor Post asesu liuhosi pájina facebook Média MAKE nian, Tersa (06/06/2023).
762 total views, 3 views today
