Timor Post (20/07/2020)— Conservation International Timor-Leste servisu hamutuk ho ekipa tékniku kompostu husi Ministériu Agrikultura no Peskas liuhusi Diresaun Nasionál Konservasaun Natureza, Departamentu Área Protejida iha Nasionál no Munisipiu, Ministériu Justisa liu husi Diresaun Nasionál Informasaun Geoespasial no autoridade munisipál halo sensebilizasaun kona-bá planu no jestaun konservasaun biodiversidade iha área protejida nasionál ba suku haat (4) ne’ebé lokaliza besik arredor Monte Legumau hanesan suku Cainleu (Ilomar, Lospalos), Larisula, Defawasi, no Uakala (Baguia, Baucau).
Liuhusi komunikadu ba imprensa ne’ebé Timor Post asesu husi parte Conservation International Timor-Leste haktuir, sensebilizasaun públiku ne’e hahú iha loron Tersa (14 to’o 17 / 07 / 2020) ho objetivu atu konsiensializa no fó hanoin komunidade ne’ebé hela besik área protejida liu-liu Monte Legumau atu proteje no konserva espésie ameasadu inklui ai-horis no animal fuik sira iha Área Protejida.
Abertura ba atividade sosiál ne’e loke husi Administradór postu Administrativu Ilomar, Lospalos João Baptista Ruas no iha postu administrativu Baguia, loke husi Administradór Postu Baguia António dos Santos. Administrator na’in rua iha sira ninia diskursu hatete katak hanesan autoridade lokál sira sempre suporta programa husi governu no ajénsia sira, inklui hasa’e konsiénsia komunidade konabá importánsia husi konservasaun no rehabilitasaun ba sustentabilidade área protejida nasionál no benefísiu ba komunidade lokál mak hela iha área refere.
Oradór importante ba atividade sensebilizasaun ida ne’e mak: Diretór Nasionál Konservasaun Natureza, Ministériu Agrikultura no Peskas, João Antalmo introduz no esplika konabá ordenamentu no sistema jestaun área protejida nasionál, no Diretór Nasionál Informasaun Geoespasial liu husi Diresaun Geral Terras no Propriedade, Ministériu Justica, Romão Guterres esplika konabá prosedimentu legal no atividade proibidu konabá lei Terras no Propriedade liga ho demarkasaun pontu ba área utilizasaun, área protejida, no direitu privasidade ba rai no riku soin sidadaun ida-idak nian. Aléinde ne’e, Xefe Departamentu Área Protejida, Pedro Pinto halo esplikasaun detallu konabá tipu espésie sira mak hahú mohu daudaun bazeia ba estudu no evidénsia sira, no ikus liu João dos Santos hanesan ema tékniku husi Departamento Área Protejida esplika konabá pontuasaun mapa no prosesu halo demarkasaun ba área protejida ba komunidade sira.
Entretantu, Xefe Suco na’in hat husi Cainleu, Larisula, Defawasi no Uakala, extensionista suco hamutuk ho konsellu suco iha entuziazmu maka’as hodi suporta atividade sensebilizasaun públiku konabá konservasaun biodiversidade ida ne’e iha sira nia suco.
Hafoin remata atividade sensebilizasaun ida ne’e iha baze, ekipa sei organiza fila fali atividade kontinuasaun konabá foti pontu koordenasaun no halo demarkasaun ba Monte Legumau iha fulan Setembru ka Outubru tinan ida ne’e.
Inisiativa ida ne’e organiza husi ekipa tékniku liu husi Diresaun Nasionál Área Konservasaun Natureza, Diresaun Nasionál Informasaun Geoespasial, Conservation International Timor-Leste, governu munisipiu, lider komunitáriu, extensionista suco, no hetan apoiu finanseiru husi Global Environment Facility (GEF). (cao)
990 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
1
/
1862
KOMPANIA DELA ABANDONA OBRA INSTALA ELETRISIDADE IHA TURISKAI
SAI XEFE SUKU NEE POVU MAK HILI LAOS GOVERNU MAK HILI
NEGOSIANTE HALO MERKADO TAIBESSI SAI FALI FATIN KOS KOSAN
1
/
1862