Dili(timorpost.com)—Governu liuhosi Autoridade Munisípiu Dili (AMD) iha loron 27 fulan Marsu tinan 2023, hahú implementa fali programa Merenda Eskolár ba iha eskola sira iha Dili laran.
“Iha Sesta semana kotuk ita asina ona karta kona-ba programa Merenda Eskolár atu nune’e iha loron 27 fulan Marsu ne’e ita hahú implementa ona ba eskola sira iha Dili laran ne’e”, dehan Diretora Finansas Autoridade Munisípiu Dili, Ana Fernanda, ba Timor Post iha Knaar fatin, Matadoro, Segunda (20/03/2023).
Nia dehan, programa Merenda Eskolár asina ona, maibé hein proposta hosi Edukasaun Munisípiu Dili(AMD) nian, depois entrega ba Prezidente Autoridade Munisípiu Dili despaxu mak foin ba prosesu ba eskola sira hodi implementa.
“Orsamentu ba Programa Merenda Eskolár nian loron 135 efetivu hamutuk 2, 767, 697.10 USD”, nia esplika.
Enkuantu eskola iha munisípiu Dili hamutuk 102 no Estudante hamutuk na’in-48, 813. Ekipa Jestaun ba Programa Merenda Eskolár ne’e hamutuk 17.
Nia dehan, ba eskola sira iha dekretu lei katak, atu forma ekipa jestaun programa merenda eskolár 17, ne’ebé kada ekipa Jestaun Programa ne’e balun iha Eskola haat ba to’o Eskola 17.
Iha Ensinu Báziku Sentrál (EBC, sigla portugés), EBC Hera hitu, EBC Sergio Vieira de Melo (neen), Esperansa da Patria (neen), Bidau Akadirahun (lima), EBC Fatumeta (haat), Manleuana (haat), 10 de Dezembru (neen), 30 de Agostu (haat), Faról (lima) no Metinaru (ualu).
Ba EBC Herois da Patria haat, Nicolau Lobato lima, Eskola Marcelo 02 Komoro lima, Amigu de Jesus haat, Estrela de Orienta 11 no EBC Sentru de Salau 11.
Enkuantu Diretór Servisu Edukasaun Munisípiu Dili, Carlito da Silva, hatete agora daudauk asina ona ba programa Merenda Eskolár iha Autoridade Munisípiu Dili, maibé sei iha prosesu hela.
1,707 total views, 3 views today
Bele hare Video Seluk :